Работниците на аеродромите, пристаништата, железницата, автобусите и метро линиите низ поголемиот дел од најголемата европска економија, од ноќеска на полноќ, го послушаа повикот од синдикатите „Верди“ и „ЕВГ“ и учествуваат во 24-часовниот штрајк
Железничкиот и транспортниот синдикат „ЕВГ“ и синдикатот на јавниот сектор „Верди“ денеска ќе излезат на предупредувачки мега штрајк во Германија, а превоз ќе нема како во железничкиот и воздушниот, така и во дел од водениот и копнениот транспорт.
Работниците на аеродромите, пристаништата, железницата, автобусите и метро линиите низ поголемиот дел од најголемата европска економија, од ноќеска на полноќ, го послушаа повикот од синдикатите „Верди“ и „ЕВГ“ и учествуваат во 24-часовниот штрајк.
„Верди“ на штрајк ги повика 120 000 вработени, а „ЕВГ“ 230 000 вработени во автобуските компании и железницата.
„Се очекува високо ниво на учество“,
изјави шефот на „Верди“, Франк Вернеке.
Возовите нема да сообраќаат речиси воопшто, а од аеродромите ќе работи само Берлинскиот.
Градскиот превоз треба да запре во седум од 16-те провинции.
Според аеродромското здружение „АДВ“, штрајкот ќе погоди стотици илјади патници.
„Околу 380 000 деловни и приватни патници нема да можат да летаат“,
соопштија од здружението.
Реткиот заеднички повик за штрајк во Германија означува ескалација на сè полошиот спор околу платите што доаѓа во време на зголемена инфлација. „Верди“ бара зголемување на месечните плати за 10,5 отсто, но минималното покачување да биде 500 евра, додека „ЕВГ“ бара зголемување од 12 отсто за оние што ги претставува.
Работодавачите – главно државните и компаниите од јавниот сектор – досега ги одбиваа барањата, наместо тоа нудеа зголемување од пет отсто со две еднократни исплати од 1 000 и 1 500 евра, оваа и следната година. Но, синдикатите ги одбија овие понуди.
Со овие акции синдикатот „Верди“ го зголемува притисокот врз третата рунда преговори со сојузната влада и локалните власти, која треба да започне денеска.
Сепак, некои синдикати успеаја да добијат големи зголемувања на платите.
Поштенските работници, претходно во март, добија просечни месечни зголемувања од 11,5 отсто, а во ноември „ИГ Метал“, најголемиот германски синдикат, обезбеди пораст од вкупно 8,5 отсто за речиси четири милиони вработени што ги претставува.
Како и многу други земји, Германија се бори со висока инфлација откако руската инвазија на Украина ги зголеми трошоците за храна и енергија.
Со оглед на тоа што инфлацијата достигна 8,7 отсто во февруари, работодавците ги обвинија претставниците на синдикатите дека придонесуваат за проблемот преку нивните барања за зголемени плати за кои велат дека само ќе ја потхранат инфлацијата. Синдикатите го оспоруваат ова и велат дека од нивните членови е побарано да го сносат товарот на зголемените трошоци за живот.