Американската морнарица, пак, ја оспори изјавата на кинеската војска, велејќи дека бродот разурнувач спроведува „рутински операции“ во Јужното Кинеско Море и дека не бил протеран оттаму
Кинеската армија тврди дека американски воен брод илегално влегол во водите на Јужното Кинеско Море.
Во соопштението на кинеската војска се наведува дека без одобрение на властите во Пекинг, американскиот брод разурнувач УСС „Милиус“ илегално влегол во кинеските територијални води, со што го нарушил мирот и стабилноста на прометниот воден пат.
„Војската во секое време ќе одржува висока готовност и ќе ги преземе сите неопходни мерки за одлучно да го заштити националниот суверенитет, безбедноста, мирот и стабилноста во Јужното Кинеско Море“,
изјави портпаролот на јужната команда на кинеската војска.
Американската морнарица, пак, ја оспори изјавата на кинеската војска, велејќи дека бродот разурнувач спроведува „рутински операции“ во Јужното Кинеско Море и дека не бил протеран оттаму.
„САД ќе продолжат да летаат, пловат и оперираат секаде каде што дозволува меѓународното право“,
се вели во соопштението на седмата флота на американската морнарица.
Вашингтон ги зајакнува сојузите во азиско-пацифичкиот регион во обид да се спротивстави на тврдењата на Кина оти има суверенитет над речиси целото Јужно Кинеско Море и Тајванскиот теснец.