Упатувам апел до ВМРО-ДПМНЕ како најголема опозициска партија да даде свој придонес и да номинира свој член во работната група. Согласен сум претседателот на работната група да биде нивен предлог, рече Лога
Работна група, која требаше да работи на подготовка на нов Изборен законик, формира и претходникот на Лога, Никола Тупанчевски, но таа не почна со работа бидејќи Беса и ВМРО-ДПМНЕ не именуваа свои претставници
Министерот за правда Кренар Лога денеска ги повика сите политички партии со консензус да го донесат новиот Изборен законик. Како што посочи тој во своето обраќање на конференцијата „Изборните реформи во Северна Македонија” што ја организираше Националниот демократски институт, негова иницијатива е политичките партии да седнат на иста маса со цел да се најде модел по кој ќе се пристапи кон изготвување на нов Изборен законик и да се постигне консензус за одредени прашања кои имаат политичка конотација зашто тоа е и препорака дадена од Венецијанската комисија.
„Дали ни е неопходна оваа реформа? Одговорот е да. Изборниот законик треба да стапи во сила најмалку шест месеци пред изборите за да можат институциите да се подготват непречено да ги спроведуваат промените. Во последниот извештај за предвремените парламентарни избори, Специјалната мисија за проценка на изборите на ОДИХР јасно стави до знаење дека сè уште има голем број прашања во законската рамка за изборите што треба да се решат. Изборниот законик треба да се ревидира сеопфатно со цел да се усогласи во рамки и со другите релевантни закони, да биде во согласност со целите на ОБСЕ, меѓународните обврски и добрите практики”,
рече Лога.
Тој информира дека Министерството за правда е во процес на формирање работна група со цел изнаоѓање на најдоброто можно решение.
„Мојата јасно зацртана цел е Изборниот законик да биде изготвен пред следните избори, а преку инклузивен процес да се гарантира правната сигурност со тоа што ќе се слушнат мислењата на сите политички партии. Затоа, ги повикувам сите политички партии со консензус да го донесеме Изборниот законик и да ги утврдиме изборните правила. Упатувам апел до ВМРО-ДПМНЕ како најголема опозициска партија да даде свој придонес и да номинира свој член во работната група. Согласен сум претседателот на работната група да биде нивен предлог“,
потенцираше Лога.
Последните измени на Изборниот законик беа направени во април 2021 година и тие се однесуваа на биометриската идентификација.
Работна група, која требаше да работи на подготовка на нов Изборен законик, формира и претходникот на Лога, Никола Тупанчевски, но таа не почна со работа бидејќи Беса и ВМРО-ДПМНЕ не именуваа свои претставници.
Лидерот на ВМРО-ДПМНЕ, Христијан Мицкоски, претходно повикуваше во Собранието, сите партии заедно да изгласаат една изборна единица, а потоа да се пристапи кон измени во Изборниот законик согласно препораките на ОБСЕ.