Денешната седница на Комисија за надзор над работата на Агенцијата за национална безбедност и на Агенцијата за разузнавање беше втор обид за назначување на директор на внатрешна контрола на АНБ, кој помина успешно за разлика од првиот. Претходниот беше во септември минатата година, но заврши без исход откако пратениците од владејачкото мнозинство кои се мнозинство и во Комисијата не дојдоа на седницата, поради што немаше кворум таа да продолжи со работа
Миле Костов е кадарот на Агенцијата за национална безбедност (АНБ) кој ќе раководи со организациската единица за внатрешна контрола на Агенцијата во наредните шест години.
Одлуката Костов да биде раководител на внатрешната контрола на АНБ е на директорот на Агенцијата, Зарко Милошевски, која денеска со мнозинство гласови беше потврдена, односно доби согласност од надлежната собраниска Комисија, без чиј амин предлогот на Милошевски не можеше да помине.
Директорот на АНБ, Милошевски, во своето излагање пред членовите на Комисијата презентираше дел од биографијата на Костов. За него тој кажа дека е дипломиран правник со 28-годишно искуство. Професионалната кариера во контраразузнавачката служба ја почнал во 1994 година како оперативен работник.
„Има дадено исклучителен придонес во заштитата на националната безбедност. Учествува на голем број обуки во земјава и во странство. Со неговиот авторитет и искуство ќе одговори на оваа значајна позиција, ќе даде придонес за професионалните стандарди и доследно почитување на законските акти на Агенцијата. Мислам дека е добар избор”,
рече директорот на АНБ.
По неговата кратка елаборација, претседателот на собраниската Комисија Љупчо Пренџов рече дека смета оти е потребно собраниското тело подетално да расправа во врска со предлогот на Милошевски. Ова беше и причина за Комисијата на сугестија на директорот на АНБ да ја затвори седницата за јавност поради класифицираноста на информациите поврзани со систематизацијата на АНБ.
„Степенот на класифицираност е државна тајна”,
посочи Милошевски.
Во „таинствена атмосфера”, зад затворени врати за јавноста и мобилни телефони на пратениците оставени во друга просторија, продолжи седницата на Комисијата, на која со мнозинство гласови бил поддржан предлогот на директорот на АНБ, Костов, да раководи со внатрешната контрола на Агенцијата.
По завршувањето на седницата, ниту претседателот на Комисијата за надзор над работата на АНБ и на Агенцијата за разузнавање Љупчо Пренџов ниту директорот на АНБ, Зарко Милошевски, не дадоа изјава за медиумите, кои иако во многу мал број, сепак беа присутни на седницата.
Дека надлежното собраниско тело со мнозинство гласови дало согласност на предлогот на директорот на АНБ за назначување на Миле Костов за раководител на внатрешната контрола на Агенцијата, кратко информираа Пренџов и дел од членовите на Комисијата.
Инаку, како што посочи Пренџов во воведниот дел за денешната точка на дневен ред на седницата, раководителот на организациската единица за внатрешна контрола на АНБ го назначува директорот на Агенцијата од делот на вработени, а по претходно добиена согласност од надлежната собраниска Комисија.
Материјалите со предлогот од АНБ за назначувањето раководител на внатрешната контрола, како што информира Пренџов на денешната седница, биле примени во Собранието на 30 јануари. Рокот што го имаше Комисијата да закаже седница и да го разгледа предлогот беше 15 дена.
Денешната седница беше втор обид за назначување на директор на внатрешна контрола на АНБ, кој помина успешно за разлика од првиот. Претходниот беше во септември минатата година, но заврши без исход откако пратениците од владејачкото мнозинство кои се мнозинство и во Комисијата не дојдоа на седницата, поради што немаше кворум таа да продолжи со работа.
За директор на внатрешна контрола тогаш поранешниот директор на АНБ, Виктор Димовски, го предложи Златко Николовски, но го повлече предлогот откако Комисијата не обезбеди кворум за да го усвои предлогот на Димовски.
Инаку, АНБ функционираше без раководител на внатрешна контрола речиси 20 месеци. Ваквата ситуација беше повод таа и нејзиниот поранешен директор Виктор Димовски да се најдат на мета на критики од страна на опозициската ВМРО-ДПМНЕ, особено по избувнувањето на аферата со давањето македонско државјанство на контроверзниот Украинец Олександр Онишченко, за што согласност дала и АНБ.
Од ВМРО-ДПМНЕ обвинуваат дека до скандалот можеби и немаше да дојде ако имало шеф и ако функционирала внатрешната контрола на АНБ. За неизборот на нејзиниот директор, пак, од партијата посочуваа дека е последица на клановски игри во владејачката СДСМ околу кадровските позиции во АНБ.