Лидерот на ВМРО-ДПМНЕ денеска потенцираше дека ставот на партијата за „27 април“ е јасен, односно, како што рече, дека луѓето се обвинети за нешто што не го сториле и бараат правда, а не амнестија и милост
Неколку адвокати денеска како препорачана пратка до парламентот испратиле предлог-закон за амнестија за настаните од 27 април 2017 година во Собранието.
Пратениците законот ќе го добијат најверојатно в понеделник, а адвокатите кои го подготвија најавуваат средби со сите пратенички групи со цел да лобираат и да се обидат да добијат поддршка за него. Еден од нив е адвокатот Јанаки Митровски кој за МИА објаснува дека со предложениот текст се предвидува целосна амнестија за лица осудени на затворски казни до 10 години и половични односно намалување на половина за лица осудени над десет години.
Само две лица се осудени под 10 години и тоа Александар Василевски – Нинџа (седум години) и Абдуљфета Алими (осум години), додека сите останати се осудени на поголеми затворски казни.
На новинарско прашање дали ќе го поддржи предлог-законот што го испратиле адвокати, лидерот на ВМРО-ДПМНЕ, Христијан Мицкоски, денеска потенцираше дека ставот на партијата за „27 април“ е јасен, односно, како што рече, дека луѓето се обвинети за нешто што не го сториле и бараат правда, а не амнестија и милост.
„Јас колку што сум информиран, предметот се наоѓа пред Врховниот суд, Јавното обвинителство доставило свое мислење и оти Врховниот суд треба да одлучува. Треба час поскоро да одлучи да го врати во прв степен бидејќи тие сè се, но само не се терористи. И тие луѓе и на судењето, еве Јане Ченто тоа ќе го каже во своите завршни зборови – Јас барам правда, да бидам суден за тоа што сум го сторил, а не за тоа што вие политички мене ме гоните“,
рече Мицкоски.