Тој истакна дека во врска со ова прашање, како опозиција имаат концептуални разлики со владиното мнозинство, затоа што сметаат дека со ситуацијата со дојавите за бомби во училиштата граѓаните мора да добијат некакви информации од институциите задолжени за безбедноста за да се успокојат
Претседателот на собраниската Комисија за надзор над работата на Агенцијата за национална безбедност (АНБ), Љупчо Пренџов ја прекина втората седница на ова собраниско тело закажана за денеска, на кое новиот директор на Агенцијата, Зарко Милошевски требаше да ги информира пратениците какви активности преземаат во врска со дојавите за бомби во училиштата и во дел од јавните објекти.
Причина, како и вчера со седницата на Комисијата за одбрана и безбедност, беше барањето на директорот на АНБ таа да биде затворена за јавноста. Вчера министерот за внатрешни работи, Оливер Спасовски побара, а мнозинството членови нја Комисијата за одбрана и безбедност изгласаа таа да биде затворена за јавноста.
„Значи и директорот на АНБ како и вчера министерот за внатрешни работи бараше седницата да биде затворена. Јас тоа како претседател мора да го ставам на гласање и мнозинството изгласа да биде затворена“,
рече Пренџов, кој доаѓа од партијата Граѓанска обнова на Македонија (ГРОМ) и во Собранието делува како пратеник од опозицијата.
Тој истакна дека во врска со ова прашање, како опозиција имаат концептуални разлики со владиното мнозинство, затоа што сметаат дека со ситуацијата со дојавите за бомби во училиштата граѓаните мора да добијат некакви информации од институциите задолжени за безбедноста за да се успокојат.
„Сметаме дека информациите кои ги добиваме од страна на надлежните кои што ги плаќаат граѓаните се должни да им објаснат на граѓаните што се случува, да ги смират, да ги успокојат и да им ги кажат точните информации. Не сметаме дека треба само ние пратениците да знаеме и притоа не смееме со никого да зборуваме и лично сметам дека граѓаните што не гласале немааат никакво фајде што 10, 15 или 100 пратеници ќе знаат што се случува, а граѓаните нема да знаат и повторно ќе имаме хаос и безредие низ скопскиуте улици. Кога имаме дојави за бомба за среќа лажни, децата се извлекуваат од училиштата, родителите се извлекуваат од работа бидејќи мораат да дојдат да ги земат. Затоа сметам дека таа паника требаше да биде биде сопрена од страна на власта и на надлежните, а ние како опозиција им ја дадовме таа можност и вчера и денес затоа ја прекинав втората, односно шестата седница на Комисијата поврзана со дојавите за бомби“,
рече Пренџов.
Вчера без учество на ВМРО-ДПМНЕ заврши седницата на собраниската Комисија за одбрана и безбедност на која министерот за внатрешни работи Оливер Спасовски го презентираше извештајот за мерките и активностите што МВР ги презело во врска со лажните дојави за поставени експлозивни направи.
Барањето на министерот за внатрешни работи Оливер Спасовски и претседателот на собраниската Комисија за одбрана и безбедност Миле Талевски седницата да биде затворена ги налути пратениците од ВМРО-ДПМНЕ кои ја напуштија седницата.
„Бегаат од одговорност и од јавноста. Информацијата што ја доставил министерот е класифицирана. Очекуваме да знаеме дека државата презела нешто, но ова што тие го бараат седницата да биде затворена, може да не наведе да мислиме дека не е преземено ништо. Се класифицира нешто што не мора да се класифицира“,
рече пратеникот од редовите на ВМРО-ДПМНЕ, Бране Петрушевски.