СДСМ, ДУИ и Левица се во коалиција со Арсовска, возвратија од ВМРО-ДПМНЕ откако социјалдемократите ги обвинија дека со доаѓањето на власт во Скопје по минатогодишните избори го заглавиле градот и покажале дека се најнеспособната локална власт во историјата
Обвинувања дека во Градот Скопје е направен пепел од една страна, а прозивки за коалиција на градоначалничката Данела Арсовска со неколку партии од друга страна, утрово разменија двете најголеми политички партии, СДСМ и ВМРО-ДПМНЕ.
„ВМРО ДПМНЕ за само една година во Скопје направи пепел, го доведе градот до состојба да не може да ги обезбеди ниту основните функции. ВМРО-ДПМНЕ го заглави градот, како што 11 години Македонија што беше заглавена. Покажаа дека се најнеспособната локална власт во историјата на главниот град. Градот назадува, нема нови проекти, наместо бесплатен јавен превоз, за прв пат во историјата Скопје остана без превоз. Приватните превозници не возат, ЈСП тоне во долгови, тешка е состојбата и во други градски претпријатија. Додека во градот владее хаос, тие се скараа за бизнис интереси, тендери и провизии, чии раце да бидат во медот“,
велат од СДСМ.
Оттаму повторно ги потенцираат заканите кои Арсовска тврди дека ѝ ги упатил Христијан Мицкоски оценувајќи дека станува збор за скандалозни наводи.
„До пред само неколку месеци, Арсовска за ВМРО-ДПМНЕ беше најдобра градоначалничка, а сега и бара доказ дека е во добра психофизичка состојба. И додека јавноста слуша за закани, клевети и навреди меѓу ВМРО-ДПМНЕ и Арсовска, СДСМ прави се за да ги реши проблемите на скопјани. Парното во Скопје веќе го презема и го управува Владата, откако Арсовска и мнозинството во Советот од ВМРО-ДПМНЕ се откажаа од него. Благодарение на одговорниот и чесен пристап на претседателот Ковачевски, блокадите на скопските улици се отстранети и дадена е шанса преку дијалог да дојдат до решение“,
посочуваат од СДСМ.
ВМРО-ДПМНЕ, пак, за состојбите ги обвинува останатите партии бидејќи тврди дека Арсовска е во коалиција со СДСМ, ДУИ и Левица.
„Левица има три директори во градот, ДУИ два, а СДС целосна контрола над градот и Арсовска целосно водејќи го најнеуспешното претпријатие ЈСП. А вчера видовме како Ковачевски ја брани Арсовска. И кога сето ова ќе се сублимира јасно е дека ниту Левица, ниту ДУИ, а најмалку СДС направија нешто за градот Скопје. Но, затоа видовме криминален договор за набавка на нафта од неколку милиони евра без рабат и попуст какви имале сите претходно договори, милионски суми за консултантски услуги и едно чудо лаги за дефокус од вистинските проблеми. Впрочем тоа е договорот Ковачевски – Арсовска и тоа е она што е договарано на тајните средби“,
обвинуваат од ВМРО-ДПМНЕ.
Оттаму ги прозиваат и градоначалниците од СДСМ да направат отчет и тврдат дека немаат сработено ништо во изминатата една година.
„Ја разбираме нервозата но и фрустрациите на СДС. Наместо кочење проекти, наместо деструкција нека се фатат за работа. Нека не го казнуваат и нека не одат против својот народ“,
велат од ВМРО-ДПМНЕ.