Насилството за кое е осуден скопјанецот се случи на 14 ноември. Тој тогаш првин вербално, а потоа и физички со тупаници го нападна снимателот на ТВ 24, Љубиша Игнатов, додека со новинарската екипа се обидуваше да сними прилог пред куќата која била пријавена како престојувалиште на украинскиот бизнисмен Олександр Онишченко
Шеесет и седумгодишниот скопјанец Милчо Пенов е осуден на условна казна затвор за физичкиот напад на новинарска екипа на ТВ 24 што се случи кон средината на минатиот месец во населбата Пржино.
Тој доби условна казна затвор со заштитен надзор доколку во наредните три години не направи ново кривично дело, односно осудениот Пенов ќе треба да оди една година на рехабилитација поради нарушено психичко здравје.
Насилството за кое е осуден скопјанецот се случи на 14 ноември. Тој тогаш првин вербално, а потоа и физички со тупаници го нападна снимателот на ТВ 24, Љубиша Игнатов, додека со неговата новинарска екипа се обидуваше да сними прилог пред куќата која била пријавена како престојувалиште на украинскиот бизнисмен Олександр Онишченко, околу кој избувна скандал поради македонското државјанство што му беше доделено иако е на „црната листа“ на САД.
По пријава на Игнатов, полицијата го приведе напаѓачот, а Основното јавно обвинителство поведе постапка против него.
„Пријавениот, на 14 ноември, со грубо навредување и грубо насилство ја загрозил сигурноста на снимател од новинарска екипа, додека кај присутните сведоци – новинар и возач на телевизиската екипа предизвикал чувство на несигурност, загрозување и страв. Осомничениот најпрвин упатил погрдни зборови и пцости кон новинарската екипа која снимала прилог, а потоа и физички го нападнал снимателот, удирајќи го со лактот во вилицата и нанесувајќи му телесна повреда – набиеница“,
соопштија тогаш од Обвинителството.