Од компанијата „ТАВ Македонија“, која стопанисува со Меѓународниот аеродром „Скопје“, соопштија дека поради дојавата за бомба утрово целиот персонал и сите патници и минувачи на аеродромот биле безбедно евакуирани и сообраќајот бил моментално запрен, но оти летовите не биле откажани
Електронски пораки со заканувачка содржина дека се поставени експлозивни направи, покрај на скопскиот аеродром, утрово стигнале и на мејловите на повеќе училишта, хотели и трговски центар, како и во Фудбалската федерација на Македонија (ФФМ)
Тимовите за антитероризам завршиле со проверките на Меѓународниот аеродром „Скопје“ и во дел од училиштата и утврдиле дека станува збор за лажни пријави за поставени експлозивни направи, потврдија за „360 степени“ од МВР.
Оттаму додаваат дека по завршувањето на проверките ќе известат и за другите објекти каде што утрово имало дојави за поставени бомби.
Од компанијата „ТАВ Македонија“, која стопанисува со Меѓународниот аеродром „Скопје“, соопштија дека поради дојавата за бомба утрово целиот персонал и сите патници и минувачи на аеродромот биле безбедно евакуирани и сообраќајот бил моментално запрен, но оти летовите не биле откажани.
„Меѓународниот аеродром ‘Скопје’ утрово преку електронска пошта прими закана за поставена експлозивна направа. Информацијата веднаш беше пријавена до Министерството за внатрешни работи, а истовремено целиот персонал и сите патници и/или минувачи кои беа затекнати на аеродромот беа безбедно евакуирани, додека единици на Министерството за внатрешни работи прават проверка на објектите на аеродромот. Летовите не се откажани, но сообраќајот е моментално запрен, сè додека не добиеме известување од МВР дека е безбедно операциите на аеродромот да продолжат по редовниот распоред“,
се вели во соопштението од „ТАВ Македонија“.
Електронски пораки со заканувачка содржина дека се поставени експлозивни направи, покрај на скопскиот аеродром, утрово стигнале и на мејловите на повеќе училишта, хотели и трговски центар, како и во Фудбалската федерација на Македонија (ФФМ).
Дојави за поставени бомби, според МВР, биле испратени на електронските пошти на 15 училишта од кои 10 во Скопје и пет во Битола.
Градоначалникот на скопската општина Гази Баба, Бобан Стефковски, објави дека осум училишта во оваа општина примиле дојави.
Според неговата објава заканите се до училиштата: „Григор Прличев“, „Наум Наумовски Борче“, „Крсте Мисирков“, „Кирил и Методиј“, „Крум Тошев“, „25 Мај“, „Дане Крапчев“ и „Наум Охридски“.
Исто така, дојава има и во основното училиште „Коле Неделковски“ во Центар, како и во средното медицинско училиште „Панче Караѓозов“.
Закани за поставена експлозивна направа стигналa и во хотелот „Мериот“ во центарот на Скопје, како и во спортската сала „Борис Трајковски“.
Како што веќе објавивме, дојави има и во хотелот „Александар палас“ каде што денеска требаше да се одржи годишна конференција на Стопанската комора на Северна Македонија, а на која беше најавено присуство на премиерот Димитар Ковачевски и министрите за економија и финансии, Крешник Бектеши и Фатмир Бесими.
Закани за поставени бомби пристигнале и во трговскиот центар „Ист гејт мол“ и во Фудбалската федерација на Македонија (ФФМ).
Од МВР велат дека по добиените пријави полицијата веднаш презела мерки за безбедно евакуирање на лицата од објектите и во тек се антитерористички проверки.