Враќањето на насилството и заплашувањето, вклучително и употребата на експлозивни направи и загрозувањето животи никогаш не е соодветен метод на протест, под никакви околности, напиша амбасадорот на Твитер
Американскиот амбасадор во Приштина, Џефри Ховениер, изјави дека САД се загрижени што во моментов нема услови за одржување избори во текот на овој месец на северот на Косово и додаде дека безбедноста на сите граѓани на Косово „мора да биде највисок приоритет“.
„Враќањето на насилството и заплашувањето, вклучително и употребата на експлозивни направи и загрозувањето животи никогаш не е соодветен метод на протест, под никакви околности“,
напиша амбасадорот на Твитер.
Оценката на Ховениер дојде еден ден откако групи граѓани на северот го спречија отворањето на канцелариите на Централната изборна комисија, што предизвика инциденти со огнено оружје и гранати.
Ховениер рече дека САД ги осудуваат овие дела и ги повика сите вклучени на воздржаност.
За 18 декември се распишани вонредни избори за градоначалници во четири општини на северот на Косово, каде што живее мнозинско српско население – Северна Митровица, Зубин Поток, Лепосавиќ и Звечан.
Тие општини се без градоначалник од српска националност од 5 ноември откако поднесоа оставка во знак на противење на одлуката на Владата на Косово да иницира процес за пререгистрација на автомобили со регистарски таблички кои се нелегални за Косово и издадени од Србија.
Како услов за враќање во институциите го наведоа формирањето на Заедницата на српските општини, што беше договорено во 2013 година со Бриселскиот договор, а Уставниот суд на Косово го прогласи за неуставен.