Станарите на зградата забележале дека ги нема вратите утрово кога тргнале на работа
Крадци откорнале и украле влезни врати од две станбени згради во Струмица. Украдени се вратите од два влеза во зграда на улицата „Ѓорги Василев“ и една од зграда на улицата „Ристо Ќурчиев“.
Станарите дури утрово забележале дека останале без влезни врати откако тргнале на работа. Според нив, кражби имало и порано, но најчесто од подрумите и им ги краделе велосипедите.
Од струмичката полиција потврдија дека имало случај на кражба на влезна врата и преземаат мерки за расчистување на случајот и откривање на сторителите.
Кај нив бил пријавен само еден случај за одземена алуминиумска врата од станбена зграда на улица „Ристо Ќурчиев“, додека за другите кражби досега немаат пријава.