Според одлуката на РКЕ, од полноќ литар бензин еуросупер БС-98 ќе чини 92,5 денари
Од ноќеска на полноќ бензинот БС-98 поскапува за два денара и ќе чини 92,5 денари за литар, одлучи денеска Регулаторната комисија за енергетика (РКЕ).
Малопродажните цени на останатите горива денеска остануваат исти и нема да се менуваат.
Па така, литар еуросупер БС-95 и натаму ќе се продава за 90 денари, литар еуродизел ќе чини 100,5 денари, а екстра лесното масло за домаќинство ќе се продава за 97 денари за литар.
РКЕ одлучи да ги зголеми малопродажните цени на нафтените деривати во просек за 0,44 проценти во однос на вчерашната одлука.
„Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 1,317 проценти, кај дизелот намалување за 0,078 проценти, кај екстра лесното масло зголемување за 0,110 проценти и кај мазутот зголемување е за 0,802 проценти. Курсот на денарот во однос на доларот во изминатиот период по кој беа формирани цените со претходната пресметка е понизок за 0,444 проценти“,
информира РКЕ.