fbpx
Свет

(ВИДЕО+ФОТОГАЛЕРИЈА) По најавата за мобилизација: Полицијата во Русија ги тепаше демонстрантите, Руси масовно ја напуштаат земјата

360степени | 22 септември, 2022 09:23

Руската полиција апсеше граѓани кои се собраа да го изразат своето незадоволство од одлуката за делумно мобилизирање на 300 000 резервисти, а на социјалните мрежи се појавија видеоснимки на кои се гледа како полицијата тепа граѓани

Авиобилетите за дестинации за кои не е потребна виза се распродадени, а оние што остануваат, пишуваат медиумите, се достапни само за петок, по цена од илјада евра и повеќе. Од синоќа се регистрираат колони на руско-грузиските гранични премини

Голем број Руси синоќа излегоа на најавените протести против мобилизацијата што вчера ја најави рускиот претседател Владимир Путин.

На видеата што се шират на социјалните мрежи се гледа како руската полиција тепа граѓани, додека насобраните извикуваат слогани против Путин. Како што може да се види на видеото што го објави соработничката на Алексеј Навални, Љубов Собољ, полицајците му ја удираат главата на еден млад човек во прозорецот, а потоа продолжуваат да го удираат по телото.

Руската полиција апсеше граѓани кои се собраа да го изразат своето незадоволство од одлуката за делумно мобилизирање на 300 000 резервисти, а на социјалните мрежи се појавија видеоснимки на кои се гледа како полицијата тепа граѓани.

На протестите ширум земјата се уапсени над илјада граѓани, а на едно од видеата се гледа како насобраните стојат пред полицијата и скандираат „Русија без Путин“.

Според „ОВД-инфо“, повеќе од 1 178 лица се веќе приведени во 38 града во земјата.

Повеќето од приведените се во Москва и Санкт Петербург.

Метежи на границите

Најавата за мобилизација предизвика Русите масовно да ја напуштаат земјата. Авиобилетите за дестинации за кои не е потребна виза се распродадени, а оние што остануваат, пишуваат медиумите, се достапни само за петок, по цена од илјада евра и повеќе.

Од синоќа се регистрираат колони на руско-грузискките гранични премини.

Границите на Грузија сè уште се отворени, но, како што пренесуваат медиумите, на некои мажи им е забранет влезот во земјата.

Во исто време, бројот на Руси кои се обидуваат да влезат во Финска се зголемува од час во час. Тоа е единствената граница која сè уште е отворена за руските цивили со шенген-визи, кои се обидуваат да ја напуштат земјата.

Балтичките земји од Европската Унија – Летонија, Литванија и Естонија, кои се граничат со Русија, веќе најавија дека нема да понудат засолниште на оние што бегаат од руската мобилизација.

„Одбивањето да се исполни својата граѓанска должност во Русија, или желбата да се стори тоа, не е доволна основа за добивање азил во друга земја“,

изјави естонскиот министер за надворешни работи Урмас Реинсалум.

Летонскиот министер за надворешни работи Едгарс Ринкевичс ја наведе загриженоста за безбедноста, а литванското Министерство за внатрешни работи објави дека секој случај за азил ќе се разгледува посебно.

Трите балтички земји и Полска во понеделникот на полноќ почнаа да ги одвраќаат руските граѓани од нивните граници велејќи дека не треба да патуваат додека нивната земја е во војна со Украина.

Забраната ги исклучува руските дисиденти кои бараат азил во ЕУ, заедно со возачите на камиони, бегалците и постојаните жители на земјите од ЕУ, како и оние што ги посетуваат членовите на блиското семејство.

Масовното иселување на Русите го објавува и „Флајт радар“, позната веб-страница која се занимава со следење летови. Тие објавија кратко видео на кое се гледа воздушниот сообраќај од Москва и Санкт Петербург направен утрово. Од видеото се гледа дека сообраќајот е зголемен, а најголем дел од летовите завршиле во Турција.

Путин вчера во говорот рано наутро најави делумна мобилизација во оваа земја и изјави дека Западот покажал дека има за цел да ја уништи Русија и ја користи Украина како „топовско месо“.

Околу 300 000 резервисти ќе бидат повикани да се борат против Украинците бидејќи руската армија доживеа катастрофални загуби на фронтот во последните денови.

(ВИДЕО) Путин прогласи делумна мобилизација и се закани со сите средства ако има закана за територијалниот интегритет на Русија

©2025 360 степени, Сите права се задржани