Бугарскиот претседател рече дека „и покрај политички страсти на кои сме сведоци во последните месеци, односите меѓу две земји почиваат на цврста основа, која е надвор од секоја политичка конјунктура“
Бугарија повторно ќе биде солидарна со „братска Македонија“. Ова го изјави претседателот на Бугарија Румен Радев пред делегацијата од Република Северна Македонија предводена од премиерот Димитар Ковачевски, јавија бугарските медиуми.
Радев рече дека „и покрај политички страсти на кои сме сведоци во последните месеци, односите меѓу две земји почиваат на цврста основа, која е надвор од секоја политичка конјунктура“.
„Тоа е основата на одлуките на Бугарија за безрезервна поддршка на Македонија од признавањето на државноста и независноста на земјата, преку инсистирање на превентивниот контингент на ОН времето на распадот на поранешна Југославија, преку обезбедување на помош за време на ембаргото, преку давање воено-техничка помош, во случај на катастрофи и елементарни непогоди. За доброто на населението од двете страни на границата, за доброто на идните генерации и за доброто на нашата заедничка европска иднина, ние сме должни да ја развиваме и зајакнеме оваа основа“,
изјави претседателот на Бугарија, Румен Радев.
Радев, како што пренесе БГНЕС изјавил дека се надева оти денешната средба на Димитар Ковачевски со бугарската влада е чекор кон постигнување заемно корисни решенија. Тој ја поздрави посетата на Софија истакнувајќи дека треба да има многу почести средби и дијалог на највисоко владино ниво за зајакнување на довербата и разбирањето.
Премиерот Димитар Ковачевски денеска е во Софија, каде имаше средба со премиерот на Бугарија Галаб Донев. Како што соопштија двајцата премиери, се зборувало за снабдување со струја од Бугарија во четвртиот квартал од оваа и првиот од наредната година. Како што рече Донев, станува збор за 200 мегават-часа пренос на енергија за периодот до 21 март 2023 година.
Ковачевски изјави дека имал позитивна средба со премиерот Галаб Донев која траела подолго од очекуваното.
Во соопштението што попладнево го објавија од Кабинетот на Ковачевски се наведува дека на состанокот со Радев на кој присуствуваа и министрите за надворешни работи и за економија Бујар Османи и Крешник Бектеши, како и директорот на ЕСМ Васко Ковачевски и претседателот на Стопанската комора на Република Северна Македонија Бранко Азески се разговараше за заедничко надминување на предизвиците со енергетската криза и продлабочување на соработка на двете земји.
„Премиерот Ковачевски на средбата истакна дека владината делегација допатува во Република Бугарија да најде решенија за справување со енормниот раст на цената на електричната енергија, да се помогне стопанството кое е на слободниот пазар, да може да го издржи високиот раст на цената на електричната енергија на светските берзи. Справување со последиците од светската енергетска криза е приоритет. Од бугарска страна беше истакнато дека во тешки денови треба да си помагаме меѓусебно , бидејќи станува збор за справување со последиците од најголемата глобална криза која ја паметиме во поновата историја“,
се вели во соопштението.