Активната блокада е единствената можна акција за делегитимирање на беззаконието на Талат Џафери, велат од ВМРО-ДПМНЕ во реакција на ставовите на собранискиот спикер, кој во интервју за Радио Слободна Европа кажа дека Собранието не може да остане блокирано поради пратениците од опозицијата.
„Во однос на уставните измени за кои Џафери зборува тоа не се обврски на државата кон ЕУ, туку обврски на кои криминалната клика на СДС ДУИ прифати за да си ги зачуваат фотелјите, а на целосна штета на македонскиот идентитет, јазик, историја и култура преку целосно национално обезличување и прифаќање на бугарските мегаломански барања.Попрво криминалната влада ќе падне, од тоа да има било какви уставни измени“,
реагираат од ВМРО-ДПМНЕ.
Претседателот на Собранието Талат Џафери ги повика сите пратеници да се однесуваат одгворно кон државните интереси. Во однос на уставните измени и внесувањето на Бугарите во Преамбулата како услов за продолжување на преговорите со ЕУ, Џафери посочи дека тоа е обврска на државата, а не на владејачкото мнозинство. Тој не прецизира какви се неговите очекувања дали би се достигнало потребното двотретинско мнозинство со евентуални гласови од пратениците од ВМРО-ДПМНЕ, но повика сите партии да се грижат за интересот на државата.
„Потребата за уставни измени не е заради потребата на мнозинството или не знам на кого, туку потреба на државата за да може да си го преземе и да го изоди патот, кој впрочем е определен пред три децении да се изоди со сите предизвици што ги има државата на тој пат. И во тој контекст сметам дека сите треба да рефлектираат по однос на интерес на државата и на граѓаните, а на по интерес на политичките партии и во смисла на дневна политика, борба за гола власт да се менува власта, туку во секој случај која и власт да дојде ќе мора да го изоди тој пат. И во тој контекст сметам дека како избрани и одговорни луѓе би требало да резонираат сите во контекст на потребата и интересот на државата и на граѓаните за да може да се отвори тој пат“
рече Џафери.
На предлогот на ВМРО-ДПМНЕ да се одржи референдум за прашањето за уставни измени и можноста иницијативата да влезе во собраниска процедура, Џафери вели дека тој ќе го почитува Деловникот.