Во понеделник кај претседателот Стево Пендаровски ќе се одржи состанок на Советот за безбедност на која, освен постојаниот состав, повикани се министерот за здравство и началникот на Генералштабот на Армијата.
Четворицата нови пациенти кај кои вчера беше потврден коронавирус денеска треба да бидат префрлени на Инфективната клиника во Скопје. Тие се наоѓаат во Девар и како што информираа вчера од Министерството за здравството, нивната состојба е стабилна. Со овие четири случаи вкупниот број заболени во државава изнесува 13.
Сите пациенти кај кои е потврден вирусот се стабилни, освен пациентката од брачниот пар од Дебар кај кои првично беше потврден вирусот, соопшти вчера на прес-конференција министерот за здравство Венко Филипче. Пациентката со влошена состојба, според вчерашните информации, е на граница за да биде поставена на апарати за дишење.
Вчера имаше уште еден сомнителен случај кај патник од Германија кој пристигнал од Скопје, но неговите резултати се покажаа негативни. Исто така, вчера попладне биле тестирани уште девет други пациенти, меѓу кои и медицинска сестра од Инфективната клиника. Кај сите тестовите биле негативни.
*Поврзана вест: Патникот кој од Германија пристигна во Скопје негативен на коронавирус, од скопскиот аеродром вратени 26 странци
Четирите нови случаи беа и причина Владата вчера да прогласи и кризна состојба во општините Дебар и Центар Жупа. Влезот и излезот од овие општини е забранет, а ангажирана е и Армијата.
*Поврзана вест: Дебар и Центар Жупа се изолираат, во карантин жителите и затекнатите граѓани
Во понеделник кај претседателот Стево Пендаровски ќе се одржи состанок на Советот за безбедност на која, освен постојаниот состав, повикани се министерот за здравство и началникот на Генералштабот на Армијата. На седницата на Советот за безбедност, како што најави претседателот вчера на прес-конференција, ќе бидат разгледувани евентуалните опции за справување со опасноста од ширење на коронавирусот. Според него, во однос на стоковните резерви нема простор за загриженост и потенцираше дека има доволно залихи и доколку се усложни состојбата со коронавирусот.
„Сите мерки кои надлежните институции ги предлагаат ќе бидат без ефект ако не дојдат до оние на кои им се наменети, значи до граѓаните, и во тој дел медиумите имаат двојна улога, и самите како граѓани на оваа земја да се придржуваат до нив, меѓутоа и да апелирате до сите останати да се придржуваат до мерките“,
рече претседателот посочувајќи дека неговиот Кабинет веќе ги редуцирал на минимум сите активности и на домашен и на меѓународен план.
*Поврзана вест: Филипче за НОВАТВ: Размислуваме за затворање и на моловите