Премиерот Оливер Спасовски во интервју за „360 Степени“ зборуваше за вчерашната лидерска средба посветена на коронавирусот и дали на средбата станало збор за можно одложување на изборите.
Тој рече дека сите лидери покажале високо разбирање за ситуацијата и дека разговарале за почитување на мерките на владата за собирите.
„Ситуацијата е сега засега стабилна, никој не може да предвиди, како што не можеше да предвидат ниту во другите држави, како може да се развива и кој би бил интензитетот на развојот на состојбата, тоа ќе зависи од многу фактори. Ниту институциите, ниту пак поединци, ниту министерства се тие коишто можат да застанат на патот на оваа криза. Едноставно, сите ние, и граѓаните и медиумите и стручните лица, сите заедно можеме да се справиме со оваа состојба“,
рече Спасовски.
Запрашан за тоа дали ова значи дека нема по секоја цена да се оди на избори на 12 април, Спасовски рече дека здравјето и животот на граѓаните се најважни.
„Не гледам кој е тој политички интерес поважен од еден човек. Јас не гледам дека интересот на една политичка партија, на еден човек, на една структура, може да биде поважна отколку живот на еден човек, на едно дете во државата. И затоа треба проценките и одлуките да се носат врз база на податоци, на информации, на претпоставки на тоа што може да ни се случи во иднина, зависно од развојот на настаните. Затоа, сега рековме дека разговараме за тоа што е потребно да се разговара – како да се ограничат собирите, како да се преземат алтернативни мерки за да можат политичките субјекти да водат предизборна кампања, меѓутоа сите сили, сите средства, сите институции ги насочуваме кон справување со овој предизвик“,
рече Спасовски.
Запрашан за ефектот на излезноста на изборите доколку се одржат на 12 април, Спасовски рече дека се анализираат сите аспекти и врз основа на тоа ќе се носат одлуките.
„Овој состанок не е состанок кој се одржал само еднаш и не може да се одржи нов состанок. Како што владата заседава постојано, во секој момент можеме да се собереме, да носиме важни одлуки“,
рече Спасовски.
Тој рече дека на вчерашната средба не била отворена темата за одложување на изборите.