Претседателот на Државната изборна комисија Александар Даштевски и неговата заменичка Дитмире Шеху денеска извршија увид на гласањето за вонредните избори за членови на Советот на општина Тетово. Тие посетија повеќе избирачки места, а Даштевски кажа дека гласањето се одвива во мирна и демократска атмосфера.
„Имаше мали технички пропусти на кои им укажавме на избирачките одбори. Некои се исправија веднаш. Се функционира во ред. На некои места имаше објавени списоци само на албански, немаше на македонски. Тоа е технички пропуст и им укажавме дека доколку има, да ги закачат да не биде пропуст да биде двојазично. Тоа се мали детали што ги утврдивме“,
изјави Даштевски.
Тој информираше дека до 11 часот во Општина Тетово гласале 6,71 проценти или 5 642 гласачи. До истиот период во Маврово и Ростуше гласале 14.11 отсто или 1 404 гласачи, а во Центар Жупа 14,47 проценти или 1 305 гласачи излезени.
„До сега на сите три места има 20 приговори за избирачко право од кои 50 отсто се решени веднаш, а другите се во постапка. Според изборниот законик. Сметам дека гласањето ќе прдолжи во ваква мирна атмосфера ќе продолжи на демократски начин, сите работи функционират добро, на правилен начин. Сметам дека така ќе биде до крајот на денот. Овие резултати ни кажуваат на тоа дека овој пат ќе имаме избор во овие општини но да почекаме да заврши процесот и да ги објавиме конечните неофицијални резултати“,
вели Даштевски.
Прашан зошто необјавувањето на списоците со улиците на македонски јазик се води како техничка грешка а не човечка неодговорност, тој вели дека за овој случај нема одговорност.
„Ги имаме, сме ги испечатиле и сме ги донеле. При примопредавање на материјалите, дали се примопредадени или не, не знам, или пак се примопредадени, а се ставени во кутија,заборавиле да ги истакнат. Нема одговорност, треба да ги закачат, им реков сега да ги закачат. Бидејќи нели тоа е пропишано да биде двојазично“,
изјави Даштевски.
Од техничките проблеми кои веднаш биле надминувани Даштевски спомена дека морало да се менуваат батерии или смарт картички на биометриските апарати.