Генералниот секретар на СДСМ, Љупчо Николовски, ја нарече опозицијата „црн пат“, а генсекот на ВМРО-ДПМНЕ, Игор Јанушев вели дека корупцијата на владејачката партија цвета
Во однос на кандидатските листи на ВМРО-ДПМНЕ за претстојните избори и изоставањето на Илија Димовски, Димитар Стевананџија, Влатко Ѓорчев, Трајко Вељаноски и други, генералниот секретар на партијата Игор Јанушев во вечерашната „Топ тема“ на Телма рече дека излегуваат на овие избори со нови луѓе кои може повеќе да придонесат и понудат за државата.
„Кажавме дека ќе излеземе со нови луѓе, никој не е венчан за функцијата, треба да дојде некој подобар, посвеж, кој можеби ќе даде повеќе. Важно е дека секој од нас е подготвен да понуди најмногу што може во однос на моменталната ситуација. Тие луѓе се дел од партијата, во иднина кога ќе бидат поинакви времињата особено по изборите, можеби ќе бидат поставени на функција“,
вели Јанушев.
Тој додаде дека она што најмногу го тишти народот е корупцијата, која последниве три години, според него, цвета.
Од друга страна, генералниот секретар на СДСМ, Љупчо Николовски, во истата емисија рече дека ќе падне и последната тврдина на Никола Груевски, алудирајќи на тоа дека тој ги составувал кандидатските листи на ВМРО-ДПМНЕ.
„Ќе одговарате, дали тоа ви се допаѓа или не. Ние нема од што да се плашиме, вие треба да се плашите. Ќе се прочисти судството од Груевски и сваровски судиите и нема да се нарачуваат пресуди. Тогаш ќе одговарате за патиштата, за незаконското финансирање на партијата, за лажните лични карти. Се што правите е обид да го вратите криминалот, да го заштитите Груевски вашиот почесен претседател кој ви ги напиша листите од Будимпешта. Ние сме автопат, а вие сè уште сте црните патишта“,
му рече Николовски на Јанушев.