САД и ЕУ, во заедничка изјава, го изнесуваат својот став за предлогот за надминување на бугарската блокада и отворање на преговорите.
„Го поздравуваме компромисниот предлог кој ги зема предвид интересите и грижите и на Северна Македонија и на Бугарија заснован на меѓусебно почитување, доверба и разбирање. Суверената одлука на Собранието на Северна Македонија ќе биде важна за да се придвижи напред. Овој дух на конструктивен компромис врз кој се гради европската интеграција треба да продолжи да ги инспирира сите кои се вклучени во овој историски процес“,
се вели во заедничката изјава на државниот секретар на САД и високиот претставник на ЕУ за надворешна и безбедносна политика.
Во изјавата на Ентони Блинкен и Јосеп Борел се потенцира дека ова е критичен момент од европската историја обележан со неоправдана агресија на Русија против Украина.
„Унапредувањето на патот на Албанија и Северна Македонија кон ЕУ е клучно за зајакнување на кохезијата и отпорноста на целиот европски континент. Водени од заедничките вредности и стандардите и одредниците на ЕУ, двете земји се подготвени да го направат следниот чекор кон членство во ЕУ. Европската Унија и САД се посветени на поблиска соработка на Западен Балкан. Обезбедувањето стабилност и просперитет и остварување на нивната европска и евроатлантска иднина останува наша заедничка цел“,
пишува во изјавата на Блинкен и Борел.
Пораката на Блинкен и Борел доаѓа непосредно пред одржувањето на координацијата на парламентарните пратенички групи на која ќе се разговара за тоа кога пакетот-документи ќе се разгледуваат на пленарна седница на Собранието. ВМРО-ДПМНЕ е против ваквата иницијатива и побара од собранискиот спикер да го врати документот назад во Владата.