Зоран Трајковски од МВР е последниот сведок на денешното рочиште за „Монструм“. Овој сведок е познат по тоа што досега беше споменуван како лицето кое пред да се случи петкратното убиство кај Смилковско Езеро дало информации во безбедносните служби дека нешто може да се случи.
Во периодот на убиството тој бил вработен во Полициската станица Драчево, но рече дека одржувал контакти со извори кои ги стекнал во текот на неговата кариера.
Тој во судница зборуваше за две информации што ги добил пред убиството на 12 април 2012 година. Едната, како што рече, била 40-50 дена пред настанот и станува збор за податок дека во Липковскиот Регион повторно се појавиле унифрмирани лица, кои сега имале амблеми на „Илирида“ за разлика од порано кога биле со значки на УЧК.
Десетина дена пред убиството, пак, добил информација од два извора, еден од Скопје еден од Србија, а информацијата била дека околу велигденските празници ќе бидат нападнати полициска патрола или невини лица. За локацијата, рече тој, не добил информација.
„Пред настанот барав средба со двајцата директори, Сашо Мијаков на УБК и Љупчо Тодоровски ма БЈБ, но не знам од кои причини тој период не беа таму. Се слушнав со пратеникот Васил Пишев, му го пренесов она што го знам. Васил ми рече дека ќе ми се јави подоцна и ќе ми каже што понатаму. Вториот пат кога ми се јави од неговиот телефон ми даде да се слушнам со друг пратеник, Веле Ѓоргиевски. Ми беше кажано дека е многу близок со тогашниот премиер Никола Груевски и дека тој ќе проба да се сретнам со некој многу битен. Човекот беше фрапиран и рече дека ова мора да се проследи, ми спушти и потоа повторно ми се јави. Ми рече дека ќе ме побара некаков функционер од военото разузнавање и дека ќе ме земе од работно место и ќе одиме да разговараме. Подоцна го примив тој повик, дојдоа, ме зедоа и отидовме во простории на военото разузнавање кои се наоѓаат непосредно до воениот базен во Аеродром. Таму разговаравме околу два часа. Ме праша дали сакам разговорот да се снима, реков ‘да’. По разговорот, ме врати дома“,
раскажуваше сведокот.
По средбата во военото разузнавање, рече Трајковски, добил повик командир од полициска станица Драчево кому му кажал каде бил и што разговарал. Командирот, пак, му рекол да состави службена белешка.
„Покрај службената белешка, се сеќавам дека напишав и оперативна информација“, рече сведокот кој посочи дека не знае што се случило со тоа бидејќи, според процедурите, откако ќе се напише белешката, се става во плик кој понатаму го презема администратор.
Неколку дена по убиството, сведочеше, тој бил повикан од заменик-командирот на станицата во Драчево.
„Таму беа двајца колеги кои тогаш првпат ги видов. Почетокот на муабетот беше дека треба да поразговараме, да се прошетаме, дека сум барал средба со директорите и тие ги пратиле. Кога станав да се прошетаме, едниот од нив изразито висок ми рече да ги оставам пиштолот и значката во сефот кај заменик-командирот, ме разоружаа, ме качија во ‘голф 5’ и ме однесоа во МВР, во зградата на Петтата управа. Ме држеа таму речиси 12 часа. Во тие часови одговорно тврдам дека барем најмалку половина од времето јас бев распрашуван за ‘Монструм’, а останатото време за убиството на Марјан Тушевски и Киро Јанев“, раскажуваше сведокот.
Инаку, убиството на Тушевски и Јанев е дел од случајот „Ровер“ каде што токму овој сведок заедно со Љубе Бошкоски и уште неколку лица беа обвинети. Сведокот Трајковски двапати беше осудуван, но Апелација исто толку пати го врати предметот, па во третата постапка доби ослободителна пресуда.
Зборувајќи за информацијата за паравоените формации, сведокот Трајковски рече дека им ја кажал и на новинари. Ден по одењето во воено разузнавање се видел со Никола Младенов, тогашен сопственик на Фокус, а на крајот на средбата дошол и новинарот Бранко Героски по чија сугестија утредента сведокот имал средба со новинар од „Фокус“ за да го брифира да објави текст за паравоените формации.
Следното рочиште продолжува на 16 март, за кога се повикани двајца сведоци.
*Поврзани вести
Муса Џафери во „Монструм“: Ни беше важно како се менаџира ситуацијата за да нема тензии
Блерим Беџети негира дека Бекир Асани му удрил шлаканица и правел притисок за „Монструм“