Градоначалникот на Сарај, Блерим Беџети, утрово дојде во Основниот кривичен суд во Скопје да сведочи за случајот „Монструм“. Во времето на петкратното убиство кај Смилковско Езеро, во април 2012 година, тој беше министер за правда, а неговиот глас се слуша во „бомбите“ во разговор со ексминистерката Гордана Јанкулоска од кои се добива впечаток дека се калкулира со екстрадицијата на првите двајца осомничени, Алил Демири и Африм Исмаиловиќ.
Одговарајќи на прашања за разговорите, Беџети коментираше дека станува збор за сензитивен процес, дека имале различни убедувања за начинот на водење на постапката, за настаните кои се случувале тогаш во Скопје и во целата држава.
„Сигурно дека сум имал разговори, не можам да се сетам што конкретно сум зборувал пред неколку години. Ги следевме протестите, сум имал и средба со семејствата на обвинетите кои од мене само побараа правдата да функционира во судот, да има коректен и фер судски процес”,
рече Беџети во сведочењето.
Обвинителот Гаврил Бубевски го потсети функционерот дека во дел од разговорот со Јанкулоска, таа инсистира на побрзо пишување на документацијата за екстрадиција, па праша дали имало некаков застој во однос на таа документација и ако имало на што се должи тоа.
„Убедувањата треба да бидат двострани, а не еднострани. Бидејќи процесот беше многу сензитивен, за целиот настан кој се случи имаше притисок од медиумите, за мене лично непотребен притисок. Јас сум постапил во рамки на законот”,
рече Беџети кој неколкупати повтори дека имале различни убедувања.
Понатаму обвинителот го потсети и на разговор каде што бара да се одложи судско рочиште за „Монструм“ зашто било закажано пет дена пред изборите.
„Ако се фокусираме само на еден разговор, ќе добиете различни впечатоци. Сметам дека е целисходно да се има целиот контекст на разговорите, не само телефонските. Ние како политичка партија баравме повторување на постапката зашто сметаме дека се разниша судството со овој и со други процеси. Не е тоа само поради изборите. Имаше медиумски притисок за кој сметам дека не е коректен“,
рече Беџети.
Прашања до сведокот поставуваа и родителите на жртвите. Таткото на едно од убиените деца праша дали е точно дека Бекир Асани му правел притисок и му удрил шлаканица на Блерим Беџети.
„Ја разбирам вашата тага. Ајде да разговараме со почит. Жалам, не сте на ниво, не заслужувате одговор. Во тага сте, инаку ќе ви дадев поинаков договор“, рече Беџети.
Таткото рече дека ја смета информацијата за релевантна затоа што ја кажал тогашниот премиер Никола Груевски.
„Па донесете го Груевски нека дојде и нека каже“, рече Беџети и додаде дека го познава Бекир Асани, но никогаш ниту му вршен притисок ниту му се јавувал.