Пратеничката Гордана Силјановска-Давкова во дискусијата рече дека дел од вината за нефункционалноста на Уставниот суд има и Собранието и затоа, според неа, мора да се воведе одредба дека постапката за избор на уставен судија треба да започнува шест месеци пред истекот на мандатот на стариот. Таа забележа и дека еден ден ќе се треба да се доведе во прашање големата моќ што ја има Комисијата за прашања за изборите и именувањата во изборот за функциите бидејќи, како што рече, една група луѓе да седи и да одлучува е остаток од времето на комунизмот
Судијата Фатмир Скендер од Апелацискиот суд Скопје го помина комисискиот филтер во Собрание за нов уставен судија.
Пратениците-членови на Комисијата за прашања на изборите и именувањата со мнозинство гласови „за“ попладнево го утврдија предлогот тој да биде судија на Уставниот суд. Против гласаа пратениците од опозицијата.
Скендер е еден од трите предлози кои на претходното продолжение на комисиската седница на 13 мај дојдоа од редовите на мнозинството. Покрај него, пратениците од СДСМ за нови уставни судии ги предлагаат и правничката Тања Васиќ-Бозаџиева и актуелниот државен обвинител Љубомир Јовески.
ВМРО-ДПМНЕ, пак, има шест предлози: професорите Саво Климовски и Родна Живковска; Тодор Витларов, кој е шеф на Вишото јавно обвинителство Штип; Воислав Димоски, актуелен обвинител во Основното јавно обвинителство Охрид; управната судијка од Битола, Весна Јовановска; и пензионираниот гостиварски судија Бранко Секулоски.
Откако овие девет имиња (трите од власта и шесте од опозицијата) претходно беа утврдени како предлози, денеска за секој од нив почна дебата во Комисијата. Меѓутоа, пратениците успеаја да ја завршат дискусијата само за кандидатот Скендер, додека за останатите имиња ќе продолжи дебатата на утрешното продолжение на седницата.
Од нив, покрај апелацискиот судија Скендер, треба да се утврдат уште двајца кандидати кои како утврдени предлози ќе се испратат на гласање на пленарна седница, каде ако ја добијат поддршката од мнозинството пратеници и официјално ќе бидат избрани за нови уставни судии.
„Не го знаеме Фатмир Скендер“, велат од ВМРО-ДПМНЕ
На почетокот на дискусијата за Фатмир Скендер, неговата биографија кратко ја прочита пратеникот Бејџан Иљас, а потоа за збор се јавуваа само пратениците од ВМРО-ДПМНЕ, додека од владејачкото мнозинство не дискутираа.
Сите забележаа зошто не беше прифатен нивниот предлог секој од кандидатите да биде повикан на седница на Комисијата за самиот да се претстави и да може да му се постават неколку прашања.
„Зошто како пратеник и член на оваа Комисија се чувствувам хендикепиран да гласам по овој предлог? Не го познавам човекот и ќе беше многу корисно ако тој предложен кандидат тука имаше лично претставување. Не го потценувам претставувањето од пратеникот, но друго е кога некој конкурира да се претстави лично и да нè убеди зошто треба да му се даде предност како кандидат за член на Уставниот суд. Ние имаме биографија, но се тоа е едно сувопарно парче хартија на кое му недостига личноста која би се обратила во живо. Ваквиот начин на одлучување ќе остави можност за недоволна запознаеност на сите членови и заменици, голем дел од нив нема да знаат за кого гласаат“,
рече пратеникот Антонио Милошоски образложувајќи зошто нема да гласа „за“.
И неговиот сопартиец, Миле Лефков, во дебата посочи дека со тоа што кандидатите не се повикуваат лично да се претстават се создава непотребен сомнеж.
„Немаме никаква фотографија од човекот кој се очекува да биде уставен судија. Се однесуваме кон нив како кон апстрактна материја, не велам дека е лош кандидат, но сметам дека е редно ако за кое било работно место се пријавуваат и разговараат, редно е овде да ги видиме“,
рече Лефков.
„Еден група на луѓе одлучува за избори на најзначајните функции – тоа е остаток од комунизмот“, забележа Силјановска-Давкова
Со слични забелешки настапија уште неколку нивни сопартијци, а пратеничката Гордана Силјановска-Давкова, пак, имаше и неколку други забелешки воопшто околу процедурата на избор.
Прво, таа забележа дека со тоа што уставниот суд е нефункционален со оглед дека не е комплетен, е вина и на самите пратеници.
„Под итно треба во измените на деловникот да внесеме одредба во која ќе напишеме дека шест месеци пред истекот на мандат на судија ќе почне нашата постапка за избор, за да не дојде до вакум во работата. Ние сме директни соучесници во кршењето на владеењето на правото односно ние сме фактор во овозможување на нефункционалното работење на Уставниот суд“,
рече Силјановска-Давкова.
Зборувајќи за процедурата за избор, таа рече дека ќе дојде ден кога ќе се проблематизира и самата надлежност на собраниската Комисија.
„Дали знаете каква моќ значи овде група на луѓе да одлучуваат за избори и именувања на најзначајните функции? Ова е остатокот од комунизмот“,
рече Силјановска-Давкова додавајќи дека би требало за секој избор да се формира посебна комисија со посебна мешана структура на експерти.
Силјановска-Давкова забележа и дека е потребно да се воведат стандардизирани модели на биографија, како и да се научиле дека интервјуто за избор на кандидати за сите функции треба да стане задолжително.