Во текот на досегашната дискусија, пратеникот Антонио Милошоски рече дека е добро да дојдат кандидатите сами да се претстават и дека можеби ќе ги разубедат пратениците дали и кој од нив е истакнат правник за да биде уставен судија, па како пример направи паралела помеѓу предлогот на мнозинството за кандидатката Тања Васиќ-Бозаџиева која пред неколку месеци магистрирала на Правниот факултет, а ментор ѝ била професорката Родна Живковска, која, пак, е предлог на ВМРО-ДПМНЕ
Од СДСМ, пак, на прес-конференција ги критикуваа дел од опозициските предлози, меѓу кои и професорката Живковска потенцирајќи дека таа е мајка на Иван Живковски кој е претседател на Советот на Општина Кисела Вода каде што локалната власт ја има опозицијата, а воедно е и адвокат на јавното претпријатие Лајка
На собраниската Комисија за прашањата за изборите и именувањата и по речиси два часа од почетокот на седницата не почна расправата за кандидати за уставни судии.
Предложени се девет – тројца како предлози на владејачкото мнозинство, шест на опозицијата, а од нив Комисијата треба да избере тројца кои потоа ќе одат на дебата и на гласање на пленарна седница на Собранието.
Меѓутоа, речиси два часа членовите на собраниската комисија полемизираа околу предлозите на опозицијата, најмногу за барањето на ВМРО-ДПМНЕ кандидатите да бидат поканети на седницата, да им се дадат по 20 минути секој од нив да се претстави и да му се постават по неколку прашања.
Предлогот не го поддржаа пратениците од власта, а со оглед дека го имаат и мнозинството во оваа комисија, тој не беше усвоен.
„Не бараме да се повикаат тука и да им правиме некакво интервју, туку само бараме да се овозможи да дојдат и секој да се претстави по 20 минути за тоа кој е, каде учел, што работел, какви се неговите планови, амбиции и капацитет да биде член на Уставниот суд. Нема причина да се крие некој од кандидатите зад биографијата, а да не биде поканет да се претстави лично пред Комисијата и пред јавноста во чие име утре ќе носи одлучи за човековите слободи и права, не гледам зошто би се криел ако нема нешто што ние не го знаеме“,
рече пратеникот Антонио Милошоски кога го изнесуваше барањето.
Уставен судија може да биде истакнат правник, а по биографија сите се правници. Но, рече Милошоски, само со лично обраќање ќе се види кој е истакнат правник. Тој како пример направи корелација помеѓу предлогот на власта за уставен судија да биде избрана Тања Васиќ-Бозаџиева, и предлогот на ВМРО-ДПМНЕ за универзитетската професорка Родна Живковска.
„Можеби ќе нè разубедат дека некој што не го сметаме за истакнат правник е можеби поистакнат правник и од некој од кандидатите што ги сметаме за прилично реномирани. Еве, ќе ви кажам мал податок кој не мора ништо да значи, госпоѓата Тања Васиќ-Бозаџиева пред неколку месеци магистрирала на правниот факултет, а ментор ѝ била професорката Родна Живковска. А сега ќе разговараме кој е поистакнат правник, дали кандидатот кој сега скоро магистрирал или кандидатот кој бил професор и ментор на многу истакнати правници“,
рече Милошоски.
Додека ВМРО-ДПМНЕ споменуваше кандидати на почетокот на седницата, пред да почне дебата за предлозите, СДСМ, пак, критикуваше на прес-конференција. Пратеничката од владејачката партија, Фаница Николоска, го критикуваше токму предлогот за професорката Живковска наведувајќи ја како пример за обид за партиски инсталации на ВМРО-ДПМНЕ во судството со оглед дека таа е мајка на Иван Живковски кој е претседател на Советот на Општина Кисела Вода каде локалната власт ја има опозицијата, а воедно е и адвокат на јавното претпријатие „Лајка“. Николоска на прес-конференција го критикуваше и предлогот за уставен судија да биде избран Саво Климовски.
„Саво Климовски – докажан бранител на режимот. Саво Климовски беше еден од говорниците на протестите пред 27 април кога ги хушкаше граѓаните да се спротивстават на промената на власта. Неговиот син Александар Климовски исто така бранител на режимот, денес е стратешки соработник на Христијан Мицкоски. Понатаму ВМРО-ДПМНЕ ја предлага Родна Живковска, мајка на Иван Живкоски, некогашен партиски избран лидер на студентите, денес претседател на Совет на Општина Кисела Вода од редовите на ВМРО-ДПМНЕ и адвокат на градското јавно претпријатие Лајка. Како предлог за уставен судија од пратениците од ВМРО-ДПМНЕ е и Весна Јовановска, некогашна пратеничка од оваа партија. Еве како ВМРО-ДПМНЕ го замислува Уставниот суд, како место за згрижување на свои партиски кадри, нешто слично што го прави со секоја институција со која раководи нивен кадар“,
рече пратеничката на СДСМ.
Од ВМРО-ДПМНЕ ѝ замерија на власта зошто Николоска на прес-конференција плукала по нивните кандидати уште пред да почне дебата во Комисијата, а откако беше одбиен нивниот предлог кандидатите да бидат повикани и лично да се претстават, најавија дека ќе поднесат официјална иницијатива за секој кандидат да се свикува посебна седница за дебата и тој да биде поканет на истата.
Во моментов во тек е пауза на седницата на Комисијата за прашања за изборите и именувањата, по што се очекува да продолжи и да се помине кон дебата за секој од кандидатите.
Тројцата уставни судии кои треба да се изберат треба да ги пополнат местата кои ги испразнија поранешните уставни судии (Сали Мурати, Елена Гошева и Никола Ивановски) чиј мандат заврши на крајот на мај лани.
Освен споменатата Тања Васиќ Бозаџиева, останатите двајца предлози на парламентарното мнозинство се актуелниот државен обвинител Љубомир Јовески; судијата Фатмир Скендер од Апелацискиот суд Скопје.
Шесте имиња кои ги предложи ВМРО-ДПМНЕ, пак, меѓу кои и професорите Саво Климовски и Родна Живновска се и: Тодор Витларов, кој е шеф на Вишото јавно обвинителство Штип; Воислав Димоски, актуелен обвинител во Основното јавно обвинителство Охрид; управната судијка од Битола, Весна Јовановска; и пензионираниот гостиварски судија Бранко Секулоски.
Седницата која се одржува денеска за дебата за предлозите, всушност, е продолжение на седница која беше закажана уште пред една година кога се испразнија трите места во Уставен. Таа започна во јуни лани, но почна во тензична атмосфера по што беше прекината. Откако неколку месеци не можеа да се утврдат предлози, Комисијата за прашања на изборите и именувањата во меѓувреме претрпе и измени во составот. Нејзиниот поранешен претседател, Костадин Костадинов, на локалните избори во октомври 2021 година стана градоначалник на Струмица и го напушти парламентот. Дојде и до прекројување на мнозинството откако по истите избори Беса одлучи да излезе од мнозинството и да премине во опозиција. Одреден период се водеше и полемика дали нејзиниот пратеник Фадил Зендели треба да биде член на оваа комисија. На 3 март годинава модифицираното мнозинство, кое беше на став дека пратеникот не треба да го зазема местото кое ѝ припаѓа на владејачката коалиција, успеа да го разреши Зендели. На пленарна седница на 16 март конечно се комплетираше составот на Комисијата кога Марија Георгиевска од СДСМ беше избрана за нова претседателка на местото на Костадинов, а нејзиниот сопартиец Дарко Каевски беше избран за нов член на местото на Зендели.
На на 13 мај, Комисијата конечно успеа да ги утврди само предлозите, по што следува денешното продолжение на кое треба да се почне со дискусија за секое од имињата.