Србија е единствената земја во овој дел од светот која сè уште не се приклучила на западните санкции, со што им овозможува на руските компании да продолжат да работат со светски клиенти во безбедно и стабилно опкружување
Искуството на адвокатските канцеларии покажува дека новодојдените Руси потпишуваат договори за недвижности на година, две или три, а тоа се показателите кои говорат дека овие фирми ќе бидат тука на среден рок
Од почетокот на војната во Украина на 23 февруари, до 1 април, повеќе од 300 компании чии основачи се од Русија, почнаа да работат во Србија. За споредба, ако се погледне периодот од три години пред почетокот на војната, во Србија се регистрирани 435 руски фирми. Повеќето од регистрираниите компании се занимаваат со програмирање, консалтинг, ИТ услуги, трговија на големо итн, објави порталот од Нови Сад „021“.
Според домашните адвокатски канцеларии во нив се вработуваат од 10 до 70 лица.
Скок на цените на недвижностите
Доаѓањето на голем број руски компании и Руси предизвика ненадеен скок на цените на пазарот на недвижности во Србија – Русите кои почнуваат бизнис се селат со цели семејства, што значи дека ако руска компанија има 300 луѓе, тоа е автоматски прилив од 1 000 Руси, се вели во написот на „021“, кој се повикува на „Нова економија“.
Цените на недвижностите се двојно зголемени во некои делови на Белград, а растат и во Нови Сад. Повеќе не може да се изнајмува стан на месечно ниво, бидејќи со Русите се склучуваат годишни договори.
Искуството на адвокатските канцеларии покажува дека новодојдените Руси потпишуваат договори за недвижности на година, две или три, а тоа се показателите кои говорат дека овие фирми ќе бидат тука на среден рок.
„Очекуваме повеќе големи руски компании да започнат бизнис овде, како што е ‘Јандекс’ кој има намера да пресели 300 вработени и ‘Луксофт’ кој има исто толку вработени“,
велат адвокатите, додавајќи дека и двете компании веќе бараат поголеми деловни простории.
Зошто руските компании ја гледаат Србија како спасоносно решение?
„Србија е единствената земја во овој дел од светот која не воведе санкции кон Русија, што резултира со егзодус на руски компании и отворање на компании претежно во Белград, но и низ целата земја“,
се наведува во написот.
Според дипломатски извори на „Нова економија“, во Србија има повеќе од 30 000 Руси. Русите имаат проблеми со користењето на картичките и вадењето пари, но засега има начини тоа да се надмине.
„Србија е единствената земја која сè уште не се приклучила на 5-тиот пакет западни санкции, со што им овозможува на руските компании да продолжат да работат со светски клиенти во безбедно и стабилно опкружување. Постапката за регистрирање фирма е иста за Русите како и за домашните бизнисмени. Србија и Русија потпишаа договори кои им овозможуваат на руските инвеститори да пласираат производи на пазарот на ЕУ без царина. Исто така, двете земји потпишаа договор за избегнување на двојното оданочување“,
се објаснува во написот.