Откако заврши сведочењето на српскиот композитор Александар Фута Радуловиќ, денешното рочиште за случајот „Рекет“ продолжи со презентирање материјални докази од одбраната на Бојан Јовановски-Боки 13.
Така, меѓу материјалните докази на Боки е и заверена изјава на нотар од фудбалерот Стевица Ристиќ во која тој кажува дека во август 2017 му позајмил на обвинетиот 125 000 евра.
Покрај оваа, во доказите е и веќе споменатата изјава од Радуловиќ и неговата сопруга Марина Туцаковиќ во која тие исто така наведуваат дека му давале пари на Боки.
*Поврзана вест
Русковска до српскиот композитор: Имате ли доказ дека сте му давале пари на Боки за 1ТВ?
Во листата има и материјални докази за продажба на имот од баба му на Боки, Евгенија, како и за денационализација на имот од која добил 300 000 евра.
Во доказите што ќе се презентираат, пак, на рочиштето закажано за четврток, има и фотографии со кои Боки ќе се обиде да докаже дека голем дел од облеката била купена пред периодот за кога обвинителството тврди дека бил правен рекет и парите се переле преку купување гардероба.
Следниот петок, пак, судскиот процес ќе продолжи со сослушување на сведоците на Катица Јанева, а потоа и доказите на нејзината одбрана. Дел од рочиштата, најавија нејзините адвокати, ќе бараат да бидат затворени затоа што ќе се презентираат детали од случаи на СЈО кои се во фаза на истрага или предистрага.