Британската министерка за надворешни работи Лиз Трас денеска изјави дека Русија мора да биде суспендирана од Советот за човекови права на Обединетите нации поради масовните гробници пронајдени во Буча, Украина.
„Со оглед на веродостојните докази за воени злосторства, вклучително и извештаите за масовни гробници во Буча, Русија не може да остане членка на Советот за човекови права на ОН“,
напиша Трас на Твитер.
Украинските власти вчера соопштија дека истражуваат можни злосторства на руските сили откако, како што тврдат, пронашле стотина тела расфрлани во градовите, меѓу кои и Буча, а по повлекувањето на руските сили од таа област, објавија западните медиуми.
Од претходно, Канцеларијата на обединетите нации во Украина евидентираше и повеќе масовни гробници во Мариупол, меѓу кои во една имало и 200 мртви тела.