Место во обраќањата на денешниот настан за Денот на НАТО најде и руската инвазија на Украина. Северна Македонија, порача Ковачевски, целосно ја усогласи својата надворешна политика со политиките на НАТО и ЕУ и ја оцени руската воена агресија како неиспровоцирана и неоправдана и како сериозно кршење на меѓународното право и брутално загрозување на суверенитетот и територијалниот интегритет на Украина
Со членството во НАТО, Северна Македонија е фактор на стабилност и безбедност во регионот, порачаа претставници на власта на денешниот настан по повод одбележувањето на Денот на НАТО во организација на Евроатлантскиот совет на Северна Македонија, а во соработка со Министерството за одбрана, Едукативниот центар М6 и Секторот на НАТО за јавна дипломатија од Брисел.
Меѓутоа, тие испратија и пораки дека се потребни забрзување на пристапниот процес и интеграцијата во ЕУ.
Премиерот Димитар Ковачевски порача дека ни се потребни предвидливи, веродостојни, засилени и забрзани процеси на интеграција во ЕУ, бидејќи прашањето на проширувањето, веќе се и геостратегиско и безбедносно прашање и дека евроинтегративните процеси треба да започнат без ден одлагање и Северна Македонија да има кристално јасна перспектива во ЕУ.
„Процесот на интеграција во НАТО Алијансата беше долг, но сега во криза гледаме колку значи да се биде земја чија безбедност се гарантира од страна на најголемиот безбедносен и одбранбен сојуз. Продолжуваме мотивирано и одлучно кон остварување на втората наша стратешка цел – членство во ЕУ. Ја имаме целосната поддршка од САД и нашите европски партнери и високо ги цениме пораките за забрзување на отворањето на пристапните преговори со ЕУ“,
изјави Ковачевски.
Слични пораки испрати и претседателот на Евроатлантскиот совет на Северна Македонија, Исмет Рамадани, во своето обраќање на отворањето на настанот.
„Порака до сите европски претставници. Во овие тешки времиња, кога се наоѓаме пред економска, политичка и безбедносна криза, да направиме еден ангажман сите заедно, со заемен интерес, што побргу да се отворат преговорите со ЕУ и што подинамично да стапиме како членка на ЕУ, за да ја заокружиме и втората стратешка цел како држава“,
изјави Рамадани.
Апел до Унијата за проактивен пристап и забрзување на процесот упати и шефот на дипломатијата Бујар Османи кој, пак, денеска организираше прием во МНР по повод Денот на НАТО.
„Алијансата е поддржувач на евроатлантска ориентација на нашиот регион, посветена на безбедноста и стабилноста на земјите од Западен Балкан, регион од стратегиско значење на НАТО, со кој има долга историја на соработка и спроведување на операции, кои го овозможија мирот и стабилноста. Вонредната ситуација на европскиот континент покажува дека проширувањето на ЕУ е првенствено безбедносна политика и затоа во оваа пригода упатуваме уште еден силен апел до Унијата за проактивен пристап и забрзување на евроинтегративните процеси на земјите од Западен Балкан, што е од суштински интерес за зачувување на безбедноста на Европа“,
потенцираше Османи.
И руската инвазија на Украина во фокусот на Денот на НАТО
На настанот што го организираше Евроатлантскиот совет на Северна Македонија, во обраќањата место најде и руската инвазија на Украина. Северна Македонија, порача Ковачевски, целосно ја усогласи својата надворешна политика со политиките на НАТО и ЕУ и ја оцени руската воена агресија како неиспровоцирана и неоправдана и како сериозно кршење на меѓународното право и брутално загрозување на суверенитетот и територијалниот интегритет на Украина.
„Сите земји членки на НАТО се залагаат за итно запирање на воената агресија, а преземањето на активности за економска изолација на Русија ќе овозможи деескалација на воените активности“,
изјави Ковачевски.
Северна Македонија, рече тој, е одлучна да придонесе во справувањето со ризиците преку заеднички пристап и соработка со нашите НАТО-партнери и со институциите и агенциите на ЕУ.
Бизнисот да ги искористи придобивките од НАТО-членството
Обраќање на настанот имаше и министерката за одбрана, Славјанка Петровска, која посочи дека земјава одамна го трасираше својот пат кон НАТО, а по речиси три децении ја мина и целта што гледано од денешна перспектива, според неа, потврдува дека како држава сме ја направиле вистинската одлука.
Таа апелираше до компаниите и стопанските комори да ја засилат соработката и максимално да ја искористат можноста за влез на нашите бизниси на пазарот на НАТО.
„Со зачленувањето во НАТО, покрај гаранциите за безбедност, се обезбеди и сигурност за домашните компании при склучувањето партнерства со странски фирми. Дополнително, се отвори и можноста за нашите компании активно да учествуваат на јавните набавки кои се објавуваат од НАТО агенциите за набавки. Досега, постапката за регистрација за учество на НАТО-јавните набавки ја имаат направено 13 компании. Но, јас ве охрабрувам заедно да ги искористиме овие можности. За оваа цел, компаниите имаат вистински партнер во Министерството за одбрана во чии рамки е воспоставен Центарот за поддршка на македонските компании за пробив на НАТО пазарот. Овој центар ќе го зајакнеме и со луѓе и со експертиза. Ги повикувам компаниите и коморите на соработка – да ја искористиме можноста најдобро што можеме, нашите бизниси да влезат на пазарот на НАТО“,
потенцира министерката.
На настанот присуствуваа и британската амбасадорка Рејчел Галовеј, амбасадорката на САД, Кејт Мари Брнз и заменик-помошничката на генералниот секретар за јавна дипломатија на НАТО, Кармен Ромеро.