Промотивните политички спотови станаа главна алатка во онлајн кампањата на СНС, а најмногу прашина се крева околу рекламите во кои актуелниот претседател и претседателски кандидат се јавува како главен актер, „глумејќи“ и спортски тренер и психолог…, веројатно во „режија“ на агенцијата на израелскиот ПР-експерт Асаф Еисин, со кого соработувал од 2004 година
Српскиот претседател Александар Вучиќ не само метафорички туку и буквално „излезе од фрижидер“ во стан на млад брачен пар, набројувајќи ги успесите постигнати во изминатиот период – во најновиот спот за претстојните претседателски избори во земјата.
На почетокот на спотот брачниот пар гледа телевизија, а мажот коментира „Леле, еве го пак“, мислејќи на Вучиќ. Жената тогаш станува да земе нешто од фрижидерот велејќи „Само уште од фрижидер што не излезе“ и во тој момент Вучиќ навистина излегува од фрижидерот.
Но зошто Вучиќ излегува од фрижидерот, освен метафорички?
„Важно ми е да допрам до секој граѓанин на Србија. Останува уште многу да се направи. Ни требаат повеќе патишта, пруги и фабрики. Ако не се лажам, добивте и субвенција за решавање на станбеното прашање. И кога сите во Србија ќе ги имаат можностите што ги имате вие денес, нема да ме гледате толку многу. И ние се трудиме тоа да се случи што поскоро“,
ѝ рече Вучиќ на жената која го отвора фрижидерот.
А дотогаш, додаде Вучиќ, запомнете, ако останеме обединети со тие цели пред нас, единствената граница се нашите соништа.
Промотивните политички спотови станаа главна алатка во онлајн кампањата на Српската напредна партија (СНС) на чело со нејзиниот лидер и претседател на Србија, Александар Вучиќ.
Како што пренесе Данас, само од распишувањето на парламентарните избори, на официјалниот инстаграм-профил на српскиот претседател Вучиќ се објавени 36 различни формати на предизборни видеоспотови, а меѓу нив се и шест официјални видеа на СНС кои се прикажуваат на телевизија.
Најголемо внимание, очекувано, привлекоа видеата на кои претседателот Вучиќ е главен актер.
Меѓу најгледаните е видеото на кое Вучиќ се претставува како спортски тренер и среде спортски натпревар, без разлика на скандирањето на навивачите, им порача на гласачите „да го погледнат семафорот и да гласаат соодветно“.
Најмногу критики, пак, доби видеото во кое Вучиќ се појавува на изложба на уметнички слики и заедно со посетителите, во манир на психолог, зборува за нивните животни грижи и толкува потсвесни проекции на нивните ставови за уметничкото сликарство пред нив.
Како што пренесе Данас, ова видео е контроверзно бидејќи сликата што ја гледаат актерите во видеото е всушност психолошкиот тест Роршах – дијагностичка алатка во психологијата што може да се користи исклучиво за таа цел. Поради ова, Здружението на психолози на Србија (ДПС) најави оти соодветно ќе реагира, со образложение дека „Роршаховите дамки се патентиран тест што имаат право да го користат само лиценцирани психолози“. Тоа е бренд кој е заштитен со закон и не може да се користи за друга цел освен како психодијагностички материјал“.
Update:
— Verica Spasojević Kralj (@KraljVerica) March 13, 2022
Društvo psihologa Srbije (DPS) će reagovati. Roršahove Mrlje su patentiran test koji imaju pravo da koriste samo psiholozi sa licencom. Radi se o brendu koji je zaštićen zakonom i ne može se koristiti u ni jednu drugu svrhu sem kao psihodijagnostički materijal. https://t.co/k3ZXLqa7Nn
Меѓу другите видеа кои се дел од кампањата на Вучиќ, повеќето од нив ги прикажуваат неговите настапи на партиски митинзи, резултатите од неговата и работата на Владата во изминатиот период и се вклопуваат во главната порака „делата говорат“ која се провлекува во предизборната кампања на СНС.
Српската напредна партија (СНС) на чело со Вучиќ, за оваа изборна кампања ангажираше израелска маркетинг компанија на чело со Асаф Еисин. Според информации на Нова.рс, поради претстојните избори, во Белград пристигнале педесетина луѓе кои се ангажирани само за креирање на кампањата.
Како што пренесува Нова.рс, оваа соработка меѓу СНС и Израелците трае од 2004 година, кога и се случила првата официјална средба меѓу Александар Вучиќ и Асаф Еисин. На тогашните избори Вучиќ загуби со само четири илјади гласови разлика.
Израелскиот ПР-експерт Еисин потоа во 2008 година работеше за „другата страна“ како советник на тогашниот претседател Борис Тадиќ, кој во вториот круг го освои вториот претседателски мандат.
Но, оваа соработка беше краткотрајна, а Вучиќ повторно го ангажираше „ПР-магионичарот“, со кој соработува и денес. Компанијата на Израелецот Асаф ја бие добар глас оти е „агенција за победа на избори“.