Како што нагласуваат од Сојузот на синдикати, заедно со Организацијата на работодавачи, во наредниот период ќе настапат пред третиот социјален партнер, Владата, со цел изнаоѓање конкретни мерки за поддршка и на работодавачите и на работниците во овие, како што велат, исклучително сложени моменти на светска здравствена, економска, енергетска и воена криза
Претставниците на Сојузот на синдикати на Македонија (ССМ) и Организацијата на работодавачите на Македонија (ОРМ) остварија средба на која се дискутираше за потребата од отпочнување социјален дијалог насочен кон усогласување на платите на работниците во приватниот сектор согласно порастот на минималната плата, соопштија од Сојузот на синдикати.
„ССМ и ОРМ како единствени репрезентативни организации на работниците и на работодавачите се договорија преку социјален дијалог во следниот период да се изнајде заеднички прифатлив модел за усогласувањето на платите на работниците во приватниот сектор согласно зголемувањето на минималната плата со колективните договори, а истото да не предизвика сериозни импликации на нормалното работење на работодавачите како и да се обезбеди сигурност и одржливост на работните места на работниците“,
соопштија од ССМ.
Како што се наведува во соопштението, ССМ и ОРМ се согласиле да пристапат кон процесот на измени и дополнувања на Општиот колективен договор за приватниот сектор од областа на стопанството, со цел уредување на сите прашања кои се во интерес и на работниците и на работодавачите.
„ССМ и ОРМ во наредниот период заеднички ќе настапат пред третиот социјален партнер, Владата, за изнаоѓање на конкретни мерки за поддршка и на работодавачите и на работниците кои ги почитуваат работничките права и кои се дел од ССМ и ОРМ во овие исклучително сложени моменти на светска здравствена, економска, енергетска и воена криза“,
додаваат од ССМ.