Британската Влада денеска, исто така, соопшти дека воведува санкции за милијардерот бизнисмен Алишер Усманов и поранешниот руски вицепремиер Игор Шувалов
САД денеска ќе воведе санкции за поголем број на руски олигарси, како и за портпаролот на Кремљ, Димитриј Песков, соопшти Белата куќа.
Како што се вели во соопштението, САД на листата на санкции додаваат неколку руски олигарси и функционери, како и некои нивни компании, а помеѓу нив се и рускиот тајкун Алишер Усманов, основач на руската металуршка компанија Металоинвест, пренесува Ројтерс.
САД исто така ќе воведе и визни ограничувања за 19 руски олигарси, членови на нивните семејства и соработници, се додава во соопштението на Белата куќа, а исто така, ќе се воведат санкции за руските субјекти и поединци кои овозможиваат ширење на дезинформации во земјата.
„Сакаме Путин да го почувствува притисокот и сакаме луѓето околу него да почувствуваат притисок“, изјави портпаролката не Белата куќа Џен Псаки.
Вашингтон веќе воведе неколку пакети санкции за руската елита вклучувајќи го и претседателот Владимир Путин и повеќе пати предупредуваше дека е подготвен да преземе и понатамошни чекори за да ја повика Москва на одговорност поради нејзината инвазија на Украина.
Во своето обраќање за состојбата на нацијата во вторникот вечерта американскиот претседател Џо Бајден рече дека САД ќе работат на заплена на јахта, луксузни станови и приватни авиони на богатите Руси кои се поврзани со Путин, соопштува Ројтерс.
Британската Влада денеска, исто така, соопшти дека воведува санкции за милијардерот бизнисмен Алишер Усманов и поранешниот руски вицепремиер Игор Шувалов, како дел од казнените мерки поради инвазијата на Москва врз Украина.
Двајцата олигарси, која поседуваат имот од 19 милијарди долари (14 милијарди фунти) и имаат „значајни интереси во Британија и блиски врски со Кремљ“, се „санкционирани со моментален ефект“, соопшти британското Министерство за надворешни работи.