На руските сили уште еднаш им порача да се вратат дома и на тој начин да ги заштитат и луѓето кои, како што рече, говорат руски јазик во Украина
Претседателот на Украина, Володимир Зеленски, објави нова видеопорака во која вели дека одбранбените линии на Украина остануваат исти, но дека од ноќеска на полноќ руските сили без престан ги гранатираат украинските градови.
„Немаме што да загубиме освен сопствената слобода“,
вели Зеленски додавајќи дека Украина секојдневно добива помош во оружје од нејзините сојузници.
На руските сили уште еднаш им порача да се вратат дома и на тој начин да ги заштитат и луѓето кои, како што рече, говорат руски јазик во Украина.
„Многупати сакале да нè уништат. Не можеле. Преживеавме толку многу пати! И ако некој мисли дека Украинците се плашат, скршени се или дека се предаваат – тој не знае ништо за Украина. И тој нема што да прави во Украина. Одете си дома. Заштитете ги луѓето што зборуваат руски. Не во целиот свет, туку во нашата земја“,
порача Зеленски.
Зеленски им вети на Украинците дека Москва ќе се плати штетата врз инфраструктурата во неговата земја предизвикана од инвазијата.
„Ќе ја вратиме старата состојба на секоја куќа, секоја улица, секој град и на Русија ѝ кажуваме: Научете го зборот репарации и отштета. Ќе ни вратите во целост сè што направивте против нашата земја, против секој Украинец“,
рече Зеленски во видеопораката која е втора денеска.
Обраќањето на Зеленски до нацијата доаѓа во мигови кога се покренува истрага за можни сторени воени злосторства на руската страна поради бомбардирање цивилни цели и невооружено население.