Помина една недела откако Русија ја почна инвазијата на Украина. И покрај силниот отпор во големите градови, руските сили досега значително напредуваа во некои делови од земјата.
Како што јавува Би-би-си, последните позначителни настани се:
- Руски падобранци се спуштиле во Харков, вториот најголем град во Украина;
- Рускиот министер за одбрана тврди дека го заробиле јужниот град Херсон;
- Русија им порача на жителите на Киев да го заминат пред планираните воздушни напади;
- Конвојот со руски воени возила долг околу 65 километри во моментов е на северната „граница“ на Киев.
Колкав дел од Украина контролира Русија
Според Институтот за проучување на војната, тинк-тенк организација која ги следи воените дејствија на терен во повеќе конфликти во светот, Русија во моментов напаѓа од четири страни. Како што може да се види на мапата подолу, која последен пат е „освежена“ на 1 март во 21 часот по македонско време, руската армија го напаѓа Киев од Белорусија (оска 1), градовите Харков и Суми ги напаѓа од своја територија (оска 2). Потоа ги помага активностите на сепаратистите во Донбас и Луганск од Ростов (оска 3) и на крај, нападите од градовите Херсон, Мариоупол, Миколаив, Запорожје ги водат единиците од Крим (оска 4). Русија го анектира полуостровот од Украина во 2014 година.
Како што покажува мапата, Русија во моментов има најголем успех на југот од земјата. Министерот за одбрана тврди дека конечно го зазеле градот Херсон, кој е пристаниште и индустриски центар. Според аналитичарите на Институтот, освојувањето на градот може да послужи како центар во кој може да се донесат луѓе и опрема за посериозен напад на Одеса, најголемото пристаниште на Украина. Во исто време, руската војска напредува и на југоисток, кон градот Мариоуопол. Доколку го освојат и овој град, тогаш руските сили ќе направат „копнен мост“ меѓу Крим и регионите Донецк и Луганск, кои од 2014 година се под контрола на руски бунтовници, а чија независност, непосредно пред војната со Украина, ја призна Москва.
Во другите делови на земјата, напредокот на руските сили оди многу побавно. Иако уште во првите делови освоија делови од североистокот на земјата (оска 2), руските сили „заглавија“ пред градовите како Харков, Суми. Последните информации од Хакрков се дека има интензивна кампања на бомбардирање. Според анализите на Институтот за проучување на војната и експерти на Би-би-си, жестокото гранатирање стратегиски цели во градот во голем дел се должи на претходниот неуспех градот да биде заземен со тенкови и жива сила „од земја“.
Како и во Харков, кој е втор најголем град во Украина, состојбата е драматична и во Киев. И таму руските сили цела недела се обидуваа да го освојат градот, но наидоа на силен отпор во предградијата Оболон (на север од Киев) и Буча (на запад од Киев). Од вчера руската војска и таму почна да уништува стратегиски цели со ракети од воздух, наместо силно да притиска со човечка сила. Сепак, околу градот се наоѓа колона од возила на руската војска долг 65 километри, што говори за неминовен обид за освојување на градот и со човечка сила.
