Белорускиот претседател Александар Лукашенко за тамошните државни медиуми изјави дека неговата војска нема да им се приклучи на руските трупи во воената инвазија на Украина, пренесува Би-би-си.
Лукашенко, инаку близок партнер на рускиот лидер Владимир Путин, порача дека белоруската војска никогаш не учествувала и нема да учествува во воените акции.
„Ова можеме да му го докажеме на кој било начин. И не само тоа – руското лидерство никогаш не го доведе во прашање нашиот став за немешање во вооружениот судир. Поради тоа, немаме намера да учествуваме во оваа специјална операција во Украина ниту во иднина. Нема потреба за такво нешто“,
изјави Лукашенко.
Вчера започнаа стравувањата на Западот дека Лукашенко се подготвува да испрати свои воени трупи, кои би се приклучиле на нападот на Киев, но претседателот тоа го негираше.
Од Стејт департментот изјавија дека Русија го погазила суверенитетот на Белорусија на тој начин што токму преку нејзината територија ја започнала инвазијата на Украина.