МНР им порачува на другите наши државјани во Одеса да се упатат во Генералниот конзулат на Бугарија во овој град, додека до останатите што се наоѓаат во другите градови во Унгарија апелира доколку се во можност да се упатат во генералните конзулати на Романија и Унгарија во западниот дел на Украина бидејќи и со нив е воспоставена соработка
Оние кои не оставиле свои податоци, пак, веднаш да се јават во МНР за да дадат прецизни информации за нивната локација со цел да се овозможи и нивна побрза евакуација
Две наши семејства со македонски државјани кои се наоѓаат во украинскиот град Одеса, се евакуираат преку воспоставен безбедносен коридор во координација во Владата на Бугарија, информираше Министерството за надворешни работи (МНР).
Тие се веќе дел од коридорот и се очекува во текот на денот да пристигнат во Бугарија.
„Во контекст на истата соработка, упатуваме апел до нашите граѓани кои се наоѓаат на територијата на Украина, доколку се во можност, да се упатат во Одеса, во просториите на Генералниот Конзулат на Република Бугарија, од каде сè уште има активни коридори за евакуација“,
апелираат од МНР.
Исто така, воспоставена е соработка и со властите на Романија и Унгарија кои ќе пружат асистенција за евакуација на други наши сограѓани кои се наоѓаат во Украина.
„Граѓаните кои се во можност треба да се упатат во западниот дел на Украина, кон Конзулатите на Романија во Солотвино и Чернаути, како и кон конзулатите на Унгарија во Узгород, Берегове и Мукачево. Информираме дека на овие локации ќе им биде пружена дополнителна помош и асистенција во насока на нивна евакуација од Украина преку овие земји. Во постојан контакт сме и со Властите во Молдавија, од каде исто така имаме добиено потврда за вклучување на нашите државјани во евентуалните нивни коридори за евакуација“,
велат од МНР.
Од Министерството додаваат дека е активиран и механизмот за цивилна заштита на ЕУ и доколку се воспостават други коридори за безбеден излез од унгарска територија дополнително ќе информираат.
До македонските граѓани кои не оставиле свои податоци МНР апелира веднаш да го контактираат Министерството за да дадат прецизни информации за нивната локација и состојба со цел да се обезбеди што е можна побрза евакуација.
Дежурниот телефонски број кој постојано е активен во МНР е: +389 75 273 732.