Ковачевски за време на учеството на Минхенската безбедносна конференција ја објави фотографијата со Петков и Блинкен и посочи дека американскиот државен секретар изразил целосна поддршка за дијалогот и пријателството на Скопје и Софија. Фотографијата потоа беше објавена и на фејсбук-профилот на Петков, но Ковачевски беше исечен
Премиерот Димитар Ковачевски денеска изјави дека сака да верува оти неговиот бугарски колега Кирил Петков ненамерно го исекол од заедничката фотографија што ја имаат тие со државниот секретар на САД, Ентони Блинкен, направена за време на Минхенската безбедносна конференција.
„Вчера веќе имаше изјава од страна на прес-службата на бугарската влада дека се работи за ненамерен пропуст. Јас и премиерот Петков и нашите делегации имавме навистина одлична комуникација во рамки на Минхенската безбедносна конференција и сакам да верувам дека одговорот кој е даден од прес-службата на бугарската влада е тој што е вистинскиот и дека ќе продолжиме со успешната комуникација и во иднина“,
изјави Ковачевски.
Станува збор за фотографијата ја објави и македонскиот премиер, а која беше направена за време на обраќањето на потпретседателката на САД, Камала Харис, на безбедносната конференција. Ковачевски посочи дека Блинкен ја изразил својата целосна поддршка за дијалогот и пријателството меѓу Скопје и Софија.
Фотографијата потоа беше објавена и на фејсбук-профилот на Петков, но Ковачевски беше исечен.
Во одговор за бугарска „Нова“, од прес-службата на Владата на Бугарија потоа одговорија дека фотографиите се направени на самата конференција, а доколку некоја од нив е редактирана, тврдат дека тоа ненамерно се случило во прес-центарот.
Ковачевски одговарајќи на новинарски прашања во врска со Бугарија, денеска уште еднаш посочи дека разговорите се водат во духот на европските вредности и на задржување на дигнитетот на граѓаните на двете држави. Тој рече дека процесот е транспарентен, односно дека и тој и Петков по нивните средби објавувале за што разговарале, како и дека министерот за надворешни работи Бујар Османи реферирал во Комисијата за надворешни работи во Собранието, а редовно ги известува и медиумите.
„Можам да ве уверам дека се она што се разговара е во духот на Резолуцијата што ја имаме донесено во Собранието и во духот на европските вредности. Се разбира, во целиот тој процес е вклучена и Европската комисија бидејќи на крајот на денот преговарачката рамка треба да биде одобрена од сите земји членки на ЕУ и врз основа на тоа Македонија да го добие датумот за отпочнување на првата меѓувладина конференција“,
рече Ковачевски.