Мицкоски вели дека ВМРО-ДПМНЕ понудиле да седнат на иста маса и да изградат заеднички став со власта во врска со проблемот со Бугарија
Лидерот на ВМРО-ДПМНЕ, Христијан Мицкоски, вели дека за да се постигне договор со Бугарија потребни се гаранции од Брисел за јазикот, специфичноста на народот и да се обврзат да не ја блокираат повеќе земјава кон ЕУ.
„Велам, ќе почнат притисоците, ќе почнат повторно притисоците врз пратениците, ќе почнат притисоците врз луѓето кои што се внатре, ќе почнат девалвирањето на тој парламент итн. И како што е сценарио, видено веќе во минатото. И затоа јас велам јас го прифаќам сиот товар врз себе да ги заштитиме тие луѓе кои што се во парламентот, да го заштитиме нивното достоинство, да ги видиме оние гаранции од Брисел и после можеме да разговараме за секакви договори“,
истакна Мицкоски, во госување на ТВ Сител.
Тој додаде дека како што стојат бројките и расположението на граѓаните таков договор каков што планира да го потпише Ковачевски нема да биде успешно поминат во Парламентот.
„И одбивам да бидам прогласен ако не го поддржам тој договор за анти ЕУ. Прво, на маса сакам да видам гаранции бидејќи и Петков бара, барам и јас гаранции. Да видам гаранции за мајчиниот мој јазик, македонскиот, да видам гаранции за мојот народ македонскиот дека има своја историја вековна, традиција, култура, обичаи, и конечно трета една гаранција дека никогаш повеќе никој нема за вакви глупости нас да не попречува да станеме земја членка на ЕУ“,
нагласи Мицкоски.
Мицкоски вели дека ВМРО-ДПМНЕ понудиле да седнат на иста маса и да изградат заеднички став со власта во врска со проблемот со Бугарија.