Костадиновска-Стојчевска се пожали и дека имало непочитување на условите, па иако било дозволено аплицирање во најмногу во дејности, некои апликанти конкурирале со проекти во повеќе дејности поради што биле одбиени сите нивни апликации. Имало и проекти со потписи од странци, како и од починати лица
Една милијарда педесет и три милиони денари (околу 17 100 000) евра ќе се поделат за проекти од областа на културата, кои се избрани на годишниот конкурс од Министерството за култура, а чии резултати беа објавени денеска.
Годинава по првпат на конкурсот се аплицираше електронски, а во системот биле евидентирани 3 769 проекти, но околу две третини од нив биле со технички пропусти поради што рокот за апликацијата во два наврати се продолжуваше.
Министерката за култура Бисера Костадиновска-Стојчевска рече дека членовите на комисиите кои одлучувале кои проекти ќе се поддржат работеле професионално и етично, како и одговорно во време на пандемија се однесувале кон распределбата на парите без да го нарушат принципот на приоритет на квалитет, а не на квантитет.
„Во вакви услови, дадена ѝ е предност на домашната ’жива култура‘. Запазени се и другите приоритети – поддршка на проекти на млади, на проекти наменети за деца или за лица со посебни потреби. Комисиите внимавале да поддржат проекти и од подносители кои досега не користеле средства од буџетот на Министерството за култура. Исто така, при селекцијата на проектите, комисиите воделе сметка и за правичната застапеност по етничка основа. Поддржани се и голем број проекти во кои до израз доаѓа интеркултурноста. Еднакво се водело сметка и за родовата рамноправност“,
рече министерката.
Сепак, таа рече дека е изненадена од релативно малиот број и генерално слабиот квалитет на пријавени проекти за електронско издаваштво во време на пандемија, кога глобално многу дејности и активности се одржаа и опстоаја токму благодарејќи на можноста да се спроведат по електронски пат.
Костадиновска-Стојчевска се пожали и дека имало непочитување на условите, па иако било дозволено аплицирање во најмногу ве дејности, некои апликанти конкурирале со проекти во повеќе дејности поради што биле одбиени сите нивни апликации. Имало и проекти со потписи од странци, како и од починати лица.
„Комисиите, во своите извештаи, посочуваат и на повторување на старите манири на дел од апликантите – од барање безобѕирно високи суми до конкурирање со стари, реализирани или веќе поддржани проекти од Министерството за култура; ист автор пријавен во повеќе улоги во повеќе проекти и покрај потпишаната изјава дека конкурира со еден проект; пријави од лица кои не се наши државјани; до потписи на починати лица или на лица кои воопшто не знаеле дека се предложени во некој проект“,
рече министерката.
За разгледување на пристигнатите пријави на годишниот конкурс беа формирани повеќе комисии за сите дејности, а како претседатели беа: за литература и издавачка дејност – Весна Димовска; за драмска дејност – Синоличка Трпкова; за фолклор и сценско-уметничка дејност – Јашар Сејдиу; за музичка и музичко-сценска дејност – Бранка Костиќ-Марковиќ; за визуелни уметности, архитектура и дизајн – Соња Абаџиева; за интердисциплинарни проекти – Зоран Петровски; за меѓународна дејност – Енвер Абдулахи; за заштита на недвижното културно наследство и заштита на аудиовизуелни добра – Валентино Димитровски; за музејска дејност – Фросина Зафировска; за библиотечна дејност – Славица Србиновска.