Министерката Тренчевска посочи дека барањето на Сојузот на синдикатите, кое го поддржуваат и другите синдикати, е реално бидејќи е во согласност со трошоците на живот и потрошувачката кошничка
Верувам дека на денешното продолжување на социјалниот дијалог на Економско-социјалниот совет ќе го донесеме најсоодветното решение, кое ќе биде прифатено од сите социјални партнери. За нас како Влада подобрувањето на економскиот статус на работниците е врвен приоритет и минималната плата ќе биде зголемена, рече министерката за труд и социјална политика Јованка Тренчевска во денешното интервју на ТВ 24.
Тренчевска посочи дека е оптимист и оти ќе се изнајде најдоброто решение за работниците, работодавачите и на Владата како партнери.
„Верувам дека на Економско – социјалниот совет предлогот ќе биде прифатен од сите социјални партнери. Кога имаме конструктивен дијалог на ЕСС, секогаш доаѓаме до решение кое е најдобро за сите вклучени страни. Буџетот е во добра кондиција и секое предложено решение ќе биде поткрепено со финансии“,
истакна Тренчевска.
Министерката Тренчевска посочи дека барањето на Сојузот на синдикатите кое го поддржуваат и другите синдикати е реално, бидејќи е согласно трошоците на живот и потрошувачката кошничка.
Синдикатите бараат 18 000 денари минимална плата или 62 отсто од просечната плата. Организацијата на работодавачи бара донесување на минимална плата со 50 отсто од просечната плата, Бизнис конфедерацијата на Македонија предлага обезбедување на финансиска помош за исплата на минималната плата од буџетот на државата.
Денеска се очекува Економско-социјалниот совет при Владата повторно да преговара за ова прашање, со цел да се одговори на овие барања.