„ЕУ е неизлечива, слаба и лишена од човечки чувства“, напиша на својот твитер-профил турскиот министер за внатрешни работи, Сулејман Сојлу обвинувајќи ја Грција за смртта на 12 мигранти кои наводно починале од студ
„ЕУ е неизлечива, слаба и лишена од човечки чувства“, напиша на својот твитер-профил турскиот министер за внатрешни работи, Сулејман Сојлу соопштувајќи оти најмалку 12 мигранти денеска починале од смрзнување во турскиот град Едрене долж границата со Грција, откако грчките власти наводно ги потиснале назад.
„Дванаесет од 22 мигранти потиснати од грчките гранични единици, на кои им биле соблечени облеката и чевлите, се смрзнаа до смрт“,
напиша Сулејман Сојлу на Твитер, споделувајќи фотографии од тела во близина на, како што рече, граничниот премин Ипсала.
Како што јавува новинската агенција ДПА, автентичноста на фотографиите не може да се потврди од независни извори. Националноста на жртвите сè уште не е позната.
Засега нема официјална реакција од Атина.
Организациите за човекови права ја критикуваат Атина за незаконско потиснување на бегалците кон Турција. Атина негира и вели дека ги штити европските граници во согласност со меѓународното право.
Во Турција во моментов има околу 3,7 милиони сириски бегалци, покрај стотиците илјади мигранти од други земји.