САД ќе продолжат да ги користат сите достапни алатки, вклучително и санкции, за да ги казнат злонамерните и дестабилизирачки актери, како и организациите и компаниите што ги поддржуваат, вели американскиот специјален пратеник за регионот
Корупцијата претставува најголем проблем на Западен Балкан, изјави специјалниот пратеник на САД за Западен Балкан, Габриел Ескобар, додавајќи дека САД ќе продолжат да ги користат сите достапни алатки, вклучително и санкциите, за да ги казнат дестабилизирачките актери.
„Корупцијата е канцер што ја нагризува вербата на граѓаните во демократијата, го намалува инстинктот за иновативност и креативност, па на тоа се трошат и онака оскудните буџети, што ги скратува инвестициите. Се троши талентот на цели генерации“,
изјави Ескобар за „Дневни аваз“, пренесува МИА.
Тој рече дека тоа ги плаши инвеститорите, додавајќи дека САД се посветени на промовирање одговорност, како и залагање за казнување на оние што се вклучени во корупција на Западен Балкан и во целиот свет.
„САД ќе продолжат да ги користат сите достапни алатки, вклучително и санкции, за да ги казнат злонамерните и дестабилизирачки актери, како и организациите и компаниите кои ги поддржуваат“,
порача Ескобар.
Тој рече дека младите го напуштаат Западен Балкан за да најдат работа и можности во други држави.
„Тоа го прават затоа што нема доволно можности за нив во нивните земји. Време е на овие млади луѓе да им се даде можност да ја искористат својата енергија и имагинација“,
истакна Ескобар.
Специјалниот пратеник на САД за Западен Балкан и посредникот на Европската Унија за дијалогот меѓу Косово и Србија, Мирослав Лајчак допатуваа вчера попладне во Приштина, во обид да му дадат нов поттик на косовско-српскиот дијалог за решавање на споровите меѓу двете држави.