Американскиот претседател Џозеф Бајден предупреди дека постои можност Русија да ја нападне Украина веќе следниот месец
Рускиот министер за надворешни работи Сергеј Лавров денеска изјави дека Русија сака дипломатија, а не војна, по американскиот повик да се „врати на преговарачка маса“ и да не ја напаѓа Украина.
„Ние го избравме патот на дипломатијата пред неколку децении“,
истакна Лавров во интервју што беше пренесено на неколку руски медиуми.
Тој нагласи и дека Русија мора да работи со сите и тоа е нејзиниот принцип.
„Ако е до Русија, нема да има војна. Ние не сакаме војни. Но, нема да дозволиме нашите интереси да бидат грубо газени, игнорирани“,
рече шефот на руската дипломатија.
Акумулацијата на десетици илјади руски војници на границата со Украина во изминатите недели ги поттикна стравувањата од евентуална инвазија. Русија негира дека планира напад.
Американскиот претседател Џозеф Бајден предупреди дека постои можност Русија да ја нападне Украина следниот месец. САД побараа и в понеделник да се одржи седница на Советот за безбедност на Обединетите нации за ситуацијата со Украина.