Тедрос Гебрејезус на последната прес-конференција посветена на коронавирусот, за оваа година рече дека сепак засилувачката доза од вакцината против ковид не е решение, туку поголема достапност на вацкината
Следната година мора да биде крајот на глобалната пандемија ковид-19, изјави денеска генералниот директор на Светската здравствена организација Тедрос Гебрејезус на последната прес-конференција посветена на коронавирусот, за оваа година.
Тој истакна дека верува во тоа бидејќи „по двегодишно искуство одлично го запознавме вирусот и имаме средства да се бориме против него“.
Проекциите на Светската здравствена организација, рече Гебрејезус, покажуваат дека до крајот на првиот квартал од следната година ќе бидат обезбедени вакцини за сите возрасни граѓани во светот, како и засилувачки дози за ризичните групи.
Но, за да се надмине пандемијата, најважно е оружјето што го имаме ефикасно да го користиме и да се грижиме за еднаквоста, бидејќи ако не се вакцинира целиот свет, не верувам дека ќе излеземе од оваа ситуација, изјави првиот човек на СЗО.
„Ниту една земја не може да излезе од пандемијата со засилувачката доза и тие не се зелено светло за победа над пандемијата како што се предвидува. Важно е да се запамети дека огромното мнозинство од оние кои беа хоспитализирани и починаа не беа вакцинирани, а не оние кои не примија трета доза. Неселективните програми со дополнителни засилувачки дози ги имаат сите шанси да ја продолжат пандемијата пред да ја прекинат со пренасочување на достапните дози на вакцини во земји кои веќе имаат високи стапки на вакцинација, давајќи му на вирусот повеќе можности да се шири и мутира“,
рече тој.
„Она што ме загрижува е дали ќе имаме сила да ставиме крај на пандемијата, а верувам дека ќе имаме“,
изјави Марија Ван Керч, која го предводи тимот на СЗО за борба против пандемијата.
Таа посочи дека експертите на СЗО се уште ги следат податоците за да утврдат дали сојот омикрон е опасен како претходните, особено делтата, додавајќи дека за тоа се уште не може да се донесе сосема веродостоен заклучок.