Сијарто: Екстрадицијата на Груевски е правно, а не политичко прашање

Ривалот на Виктор Орбан, Питер Марки-Заи, кој ќе му се спротивстави на унгарскиот премиер на парламентарните избори в година, доколку победи, во октомври најави екстрадиција на Никола Груевски во Северна Македонија

Унгарскиот министер за надворешни работи Петер Сијарто, кој денеска е во посета на земјава, изјави дека екстрадицијата на поранешниот македонски премиер Никола Груевски е правно прашање за кое е задолжен судскиот систем.

„Ова не е политичко туку правно прашање. Тоа е работа за судскиот систем и во Унгарија политичарите во врска со тоа не може да поставуваат прашање“,

изјави Сијарто на заедничката прес-конференција во МНР со шефот на дипломатијата Бујар Османи, одговарајќи на новинарско прашање зошто Унгарија не го испорачува Груевски.

Ривалот на Виктор Орбан, Питер Марки-Заи, кој ќе му се спротивстави на унгарскиот премиер на парламентарните избори в година, доколку победи, во октомври најави екстрадиција на Никола Груевски во Северна Македонија.

Ривалот на Орбан најавува екстрадиција на Груевски ако победи на изборите

Поранешниот македонски премиер Никола Груевски побегна во Будимпешта во 2018 година каде што доби политички азил. Тој е обвинет во повеќе судски процеси и осуден во предметот „Тенк“ на две години затвор за набавката на луксузниот „мерцедес“.