Мерката стапува во сила в недела на 19 декември во 6 часот наутро, и наместо 48 часа, тестот треба да биде направен најмногу 72 часа пред патувањето
Одлуката за воведување задолжителен ПЦР-тест за патување во Грција од сите земји и за сите патници, без разлика дали се вакцинирани или не, е вонредна и привремена мерка за празничниот период за да се спречи и контролира ширењето на омикрон-сојот на ковид-19 околу празниците, објасни денеска портпаролот на грчката Влада Јанис Иконому.
Мерката стапува во сила в недела на 19 декември во 6 часот наутро, и наместо 48 часа, тестот треба да биде направен најмногу 72 часа пред патувањето.
Со оглед на тоа дека мерката се однесува на сите земји, важи и за туристите од Северна Македонија.
„Тоа е вонредна мерка за празничниот период, со апсолутно конкретна филозофија. Колку што можеме повеќе да контролираме и да забавиме поголемо ширење на омикрон сојот, со цел да добиеме време за зголемување на имунизациската покриеност со бустер дозата. Со оглед на тоа што овој период ќе има раздвиженост или од наши сограѓани кои ќе се вратат во земјата за празниците или граѓани кои ќе одат во странство и ќе се вратат, неопходна е мерка што, како што знаете, ја спроведуваат и останатите европски земји, а карактерот ќе биде привремен. Во однос на временскиот период не би сакал од сега да се обврзам со точниот датум на траење, но генерално е за овој период околу празниците“,
рече Иконому.
Исклучок постои за оние патници кои во земјите од кои доаѓаат престојувале помалку од 48 часа.