Патувањата ќе бидат овозможени само за посебни причини, кои не вклучуваат туристички и деловни престои
На британските туристи ќе им биде забранет влез во Франција поради загриженоста за зголемувањето на случаите поврзани со сојот Омикрон во Велика Британија, јави Скај њуз.
Франција од сабота наутро ќе ја спушти рампата за патувања кон и од Велика Британија, освен за посебни причини.
Париз изјави дека „посебните причини“ не ги вклучуваат туристичките и деловните патувања. Француските граѓани и членовите на нивните семејства се изземени од новите правила.
За сите патници од Велика Британија се воведува обврска да се регистрираат пред нивното патување на дигитална платформа со внесување адреса на нивниот престој во Франција.
Од оние француски граѓани кои планирале да ја посетат Британија се бара тоа да го одложат.
Владиниот портпарол Габриел Атал изјави за телевизијата BFM дека мерките ќе вклучуваат намалување на валидноста на ПЦР тестовите пред поаѓање на 24 часа од 48, за патниците кои пристигнуваат од Британија.
Тие ќе мора повторно да тестираат при пристигнувањето и да се изолираат „на место што ќе го изберат“ најмалку 48 часа во очекување на резултатот, додаде Атал.
Британскиот премиер Борис Џонсон вчера повика на вакцинирање со засилувачка доза, во моменти кога омикрон варијантата на коронавирусот се повеќе се шири.
Велика Британија објави рекорден број дневни случаи на коронавирус од почетокот на пандемијата, при што денеска се евидентирани дури 78 610 нови случаи. Најголем број пријавени случаи во еден ден досега имаше на 8 јануари, 68 053, јавува Би-би-си.
Британија неодамна воведе задолжителни маски во повеќето затворени простори и ковид сертификати за големи настани во Англија за да се намали ширењето на омикрон варијантата.
„Секој возрасен во Британија од денеска може да се вакцинира со засилуваќка доза. Апсолутно е важно луѓето сега да се вакцинираат со бустер доза бидејќи Велика Британија бележи рекорден број на нови случаи“,
рече Џонсон на прес конференцијата, на која учествуваа и шефот на англиското јавно здравство проф. Крис Вити и д-р Ники Канани, директорка на примарна грижа за НХС.