На денешната владина седница се утврдени текстовите на два договора кои се однесуваат на иницијативата „Отворен Балкан“, а се поврзани со пристап на пазарот на трудот во трите земји: Северна Македонија, Албанија и Србија.
Едниот договор чиј текст е утврден е Договор за услови за интерконекција на шеми за електронска идентификација на граѓаните од Западен Балкан.
„Тој има за цел да им овозможи на граѓаните на Северна Македонија, Албанија и Србија пристап до електронските услуги на националните портали на овие земји преку креирање на електронска идентификација ’Отворен Балкан‘ остварување на можноста за пристап до пазарот на труд во трите земји“,
соопштија од Владата.
Другиот текст кој е утврден е за Договорот за услови за слободен пристап до пазарот на трудот во Западен Балкан, кој, кога ќе биде ратификуван од трите земји, а на граѓаните ќе им овозможи слободно да се движат и да работат во секоја од нив.
„Договорот за услови за слободен пристап до пазарот на трудот во Западен Балкан е резултат на иницијативата ’Отворен Балкан‘ за поедноставување на процедурите за еднаков пристап до пазарот на трудот во регионот по примерот на ЕУ, со што се прави чекор повеќе кон прифаќање на вредностите и практиките во Европската Унија“,
велат од Владата.