Истражувањето на италијанската компанија „Ното Сондаџи“, објавено на 5-ти декември покажа дека дури две третини од испитаниците ја поддржуваат вакцинацијата, но само 40 отсто од родителите би ги вакцинирале децата на возраст меѓу 5 и 11 години
Наскоро во Европа ќе започне вакцинацијата на помалите деца против коронавирус. Европските земји најавуваат различни стратегии и нивниот успех ќе биде показател колку родителите се подготвени да ги вакцинираат своите деца.
Еден италијански регион испраќа кловнови и жонглери во клиниките, Франција и Германија имаат за цел да ги вакцинираат само најранливите групи деца, додека во Данска децата се вакцинираат дури и пред да пристигнат специјализираните шприцеви и ампули.
Италија воведува „Ден на вакцинација“, Белгија ќе чека до јануари
„Вакцинирањето мора да им се претстави на децата како игра, како радосен момент во кој тие можат да се чувствуваат опуштено“, рече Алесио Д’Амато, главен здравствен службеник во италијанскиот регион Лацио. 15 декември е прогласен за „Ден на вакцинација“ за децата во овој регион.
Европската агенција за лекови (ЕМА) минатиот месец одобри употреба на помала доза на вакцината „Фајзер“ за деца на возраст од 5 до 11 години.
Датумот на започнување на вакцинацијата на децата варира, но повеќето земји со процедурата ќе започнат ден или два по пристигнувањето на првите пратки вакцини.
Малку е веројатно дека Белгија ќе започне со вакцинирање на помалите деца до почетокот на јануари, бидејќи велат ќе биде потребно време властите да подготват упатства.
Франција ќе вакцинира само две групи деца
Во Франција вакцинацијата ќе биде достапна само за децата со прекумерна тежина и оние со сериозни здравствени проблеми.
Од германската советодавна комисија за вакцинација СТИКО велат дека се уште не можат да дадат општа препорака за вакцинација поради недостиг на достапни податоци.
Се препорачува децата на возраст од 5 до 11 години да се вакцинираат доколку веќе имаат постоечки здравствен проблем.
Некои здравствени власти не чекаат пратки на специјализирана опрема, туку ги вакцинираат децата со третина од дозата на вакцина за возрасни.
Во Данска веќе се вакцинирани 49 000 деца
Првите 9 200 датуми за вакцинација беа понудени во Виена минатиот месец и сите беа резервирани за неколку дена, јавуваат тамошните медиуми.
Данска го следеше австрискиот пример и на 28 ноември рече дека нема време за губење. По помалку од две недели, дури 49 000 деца на возраст од 5 до 11 години ја примиле првата доза од вакцината, што сочинува околу 13 отсто од децата во таа возрасна група.
Во германската покраина Саксонија, една од најпогодените од новиот бран на вирусот, вакцинирани се деца под 12-годишна возраст.
Минатата недела, медицинскиот работник Франц Нопе тргнал на пат долг 100 километри, од Кемниц до Лајпциг, најголемиот град во Саксонија, за да ги вакцинира своите две деца, на возраст од седум и 11 години.
„Многу сме задоволни што сега е можно да се вакцинираат деца помлади од 12 години“, изјави тој за Ројтерс во болницата во Лајпциг.
Матилда, која во разговор за „Ројстерс“ не сакала да го открие презимето, дошла во болница со нејзината шестгодишна ќерка Ема.
„Важно е да се вакцинираат децата и да им се понуди безбедност, како што е случајот со возрасните“, рече Матилда.
Клучен чекор во справувањето со пандемијата?
Шпанија, која е една од земјите со најголем број на вакцинирани луѓе во светот, ќе започне со вакцинирање на помладите на 15 декември.
Вакцинацијата на децата и младите кои несвесно може да пренесат ковид на ризичните групи се смета за еден од клучните чекори за борба против пандемијата. Во Германија и Холандија, децата сега го сочинуваат мнозинството од заразените.
Иницијативата за вакцинирање на децата се одвива паралелно со големиот бран на зарази во Европската унија, на кој отпаѓа повеќе од половина од активните случаи во светот и половина од смртните случаи.
Околу 27 милиони деца на возраст меѓу пет и 11 години во ЕУ се подобни за вакцинација.
Родителите се загрижени за вакцините
Најголем предизвик ќе биде да се придобијат родителите. Според истражувањето на холандската телевизиска програма „Ен Вандаг“, 42 отсто од родителите на деца на возраст од 5 до 11 години рекле дека нема да ги вакцинираат своите деца, а 12 отсто рекле дека најверојатно нема да ги вакцинираат. Само 30 отсто од холандските родители рекле дека сигурно ќе го направат тоа.
Истражувањето на италијанската компанија „Ното Сондаџи“, објавено на 5-ти декември покажа дека дури две третини од испитаниците ја поддржуваат вакцинацијата, но само 40 отсто од родителите би ги вакцинирале децата на возраст меѓу 5 и 11 години.
Најголема причина за тоа е немањето податоци за влијанието на вакцините врз децата, третина од испитаниците сметаат дека децата се помалку подложни на инфекции, а девет отсто од нив се загрижени за долгорочните ефекти од вакцините.
Вакцинацијата на деца во САД започна минатиот месец, но не даде најдобри резултати. Од 28 милиони деца подобни за вакцинација, само пет милиони примиле барем една доза.