Вицепремиерот Димитров му се заблагодари на Рот за досегашната поддршка и изрази уверување дека Германија со новата влада ќе продолжи да работи на зајакнување на кредибилитетот на ЕУ
Рот вчера ја напушти функцијата министер за Европа во германската влада што ја предводеше Ангела Меркел, а сега е актуелен пратеник во Бундестагот од редовите на владејачката партија СДП.
„Би сакал да изразам благодарност до Македонците, имам многу пријатели во регионот на Западен Балкан и особено во Северна Македонија. Вашиот народ го заслужува најдоброто, а тоа е ЕУ перспектива. Новата влада останува посветена на тоа, трите партии кои ја формираа новата влада остануваат посветени и многу работиме на изнаоѓање мудро решение за да се надминат билатералните спорови. Не се откажувајте! Не се откажувајте и мојата порака до моите истакнати пријатели во Брисел и низ целата Европска Унија е – да ги одржиме нашите ветувања. Мораме да испорачаме“,
вели Рот во изјавата по средбата со Димитров.
Тој му се заблагодари на вицепремиерот за досегашната соработка, а на граѓаните им порача и дека иако патот кон ЕУ е трнлив, на крајот вреди.
„Луѓето во Северна Македонија постигнаа многу и знам дека е долг и трнлив пат, но на крајот вреди. Сегашната европска перспектива гарантира работни места, просперитет, стабилност, мир, регионално помирување и владеење на правото и почитување на етничките, верските и сексуалните малцинства. Ви посакувам сè најдобро и многу ви благодарам за одличната соработка со мојот пријател Никола и со многу други, вклучително и претставници на граѓанскиот сектор“,
вели Рот.
Димитров, пак, му се заблагодари на Рот за досегашната поддршка и изрази уверување дека Германија со новата влада ќе продолжи да работи на зајакнување на кредибилитетот на ЕУ.
„Во текот на нашата соработка, успеав одблизу да се запознаам со вредностите што ги застапуваше во текот на извршувањето на функцијата, како и со принципиелните ставови на Германија и доследноста кога станува збор за комплетирање на Европа со земјите од регионот. Таквата поддршка даде огромна сила на нашите напори за европеизација на Северна Македонија и издржливост во моментите на разочарување од неисполнетото европско ветување. Имајќи го предвид сето ова, уверен сум дека Германија ќе продолжи да дејствува во насока на зајакнување на кредибилитетот на Унијата, а во тие напори секогаш ќе имаме сојузник и пријател во ликот на Михаел Рот“,
рече Димитров.
Со оваа средба, вицепремиерот го заокружи првиот ден од работната посета на Германија. Претходно, тој учествуваше на годишниот состанок на Европскиот совет за надворешни односи (ECFR) во Берлин, а имаше средби и во германското МНР и со претседателот на Фондацијата „Фридрих Еберт“, Марин Шулц.