За 71 отсто од бугарските граѓани е поприоритетно решавањето на спорот со нашата земја, додека само два отсто од испитаниците му даваат предност на влегувањето на земјава во ЕУ, се вели во истражувањето на „Галуп Интернешнл Балкан“
За дури 71 отсто од бугарските граѓани е поприоритетно решавањето на односите помеѓу Софија и Скопје од пристапувањето на Северна Македонија кон Европската унија, според истражувањето спроведено од „Галуп Интернешнл Балкан“, пренесува БНР.
Спротивно мислење имаат 7,5 отсто од вкупно 803 полнолетни испитаници, додека 21,4 отсто од граѓаните се двоумат. Само два отсто од испитаниците му даваат предност на прашањето за влегувањето на земјава во ЕУ.
Најсилни во ставот дека е најважно да се средат односите помеѓу двете земји се возрасните групи над 45 години, додека пак понаклонети кон игнорирање на проблемите во односите со Северна Македонија се младите и луѓето со пониско образование. Најголем дел од тие што се двоумат се меѓу помладите испитаници, лицата со основно или пониско образование, како и испитаниците кои се декларирани како Турци и Роми.
Во однос на електоратот на бугарските партии има речиси едногласност. Над 80 отсто од поддржувачите на „Продолжуваме со промената“ и на ГЕРБ се на став дека приоритетно е прашањето за регулирање на односите меѓу двете земји, а потоа доаѓа патот на Северна Македонија кон ЕУ. Малку поголем е уделот на тие кои се колебаат меѓу ДПС, но и таму, најмногу се на ставот дека „најважно е решавањето на односите“.
Пред една година, пак, околу 60 отсто од сите испитаници не можеа да се одлучат која од двете опции да ја изберат, пренесува БНР.